ევროკავშირი მზად არის, აშშ-ს სავაჭრო ტარიფებზე უპასუხოს, – ამის შესახებ გერმანიის კანცლერმა, ოლაფ შოლცმა განაცხადა.
შოლცის თქმით, ევროპა მზადაა, აშშ-თან თანამშრომლობისთვის, თუმცა ევროკავშირი ასევე მზადაა, პასუხი გასცეს, თუ ვაშინგტონი არ დაუტოვებს სხვა არჩევანს და ფოლადსა და ალუმინზე ტარიფებს დააწესებს.
შოლცმა აღნიშნა, რომ ევროპა არ არის გულუბრყვილო და არც სუსტია. მისივე განცხადებით, სავაჭრო ომი ყველა მხარეს აზიანებს.
„ამიტომ ვეუბნები შეერთებულ შტატებს: ევროპის მიზანი კვლავ თანამშრომლობაა. მაგრამ თუ აშშ არ დაგვიტოვებს არჩევანს, როგორც ეს ფოლადისა და ალუმინის ტარიფების შემთხვევაშია, ჩვენ, როგორც ევროკავშირი, ვიმოქმედებთ ერთსულოვნად“, – განაცხადა შოლცმა.
ამასთან, ჰანოვერის სავაჭრო გამოფენის გახსნაზე სიტყვით გამოსვლისას, რომლის პარტნიორი ქვეყანა წელს კანადაა, შოლცმა ხაზგასმით აღნიშნა, რომ კანადა დამოუკიდებელი ქვეყანაა.
„ჩვენ თქვენ გვერდით ვდგავართ! კანადა არ არის სახელმწიფო, რომელიც ვინმეს ეკუთვნის. კანადა ამაყი, დამოუკიდებელი ერია“, – განაცხადა შოლცმა.