დღეს, ეროვნული თავდაცვის აკადემიის სამწყობრო მოედანზე აკადემიის პირადი შემადგენლობის დაჯილდოების ცერემონია გაიმართა.
აკადემიის რექტორმა, ბრიგადის გენერალმა მამია ბალახაძემ თავის გამოსვლაში აღნიშნა, რომ აკადემიაში დაიწყო კადეტთა მეცხრე საერთაშორისო კვირეული, სადაც მონაწილეობას იღებს პარტნიორი ქვეყნების 16 სხვადასხვა საგანმანათლებლო დაწესებულებების 65 მონაწილე. რექტორმა ყურადღება გაამახვილა ამ ღონისძიების უდიდეს მნიშვნელობაზე, რადგან ის წარმოადგენს განსაკუთრებულ პლატფორმას გაცვლითი პროგრამების, სწავლისა და თანამშრომლობისთვის. იგი ხელს უწყობს პროფესიონალური კავშირების განმტკიცებას ქართველ იუნკერებსა და მათ უცხოელ თანატოლებს შორის.
რექტორმა აგრეთვე ისაუბრა აკადემიაში განხორციელებული მორიგი სიახლის შესახებ, რომელიც შეეხება იუნკერების სტიპენდიის მატებას: პირველიდან მესამე კურსის ჩათვლით საბაზისო სტიპენდია განისაზღვრა 500 ლარით, ხოლო მეოთხე კურსის იუნკერებისთვის 1320 ლარით.
რექტორის ბრძანებით აკადემიის ინსტიტუციონალურ განვითარებაში შეტანილი წვლილისათვის, დაკისრებული მოვალეობის კეთილსინდისიერად და მაღალხარისხოვნად შესრულებისათვის პირად შემადგენლობას ,,ფასიანი საჩუქარი” , რექტორის პირადი საჩუქარი და ,,საპატიო სიგელი” გადაეცათ.
აკადემიის რექტორის ბრძანებით საპატიო სიგელით და რექტორის პირადი საჩუქრით დაჯილდოვდა 1 სამხედრო მოსამსახურე, 4 იუნკერი და 5 სამოქალაქო პირი, ხოლო მორიგი სამხედრო წოდება მიენიჭა ერთ სამხედრო მოსამსახურეს.
ღონისძიების ბოლოს წარჩინებულმა იუნკერებმა აღმართეს სახელმწიფო დროშა.