პარტია „ხალხის ძალის“ წევრი თამარ ჩიბურდანიძე ბრიტანეთის მიერ ორი ქართველი მოსამართლის დასანქცირებას სოციალურ ქსელში აფასებს.
„ასეთი “გაფრთხილებები” დასავლეთიდან გაგრძელდება მანამ, სანამ სასურველ შედეგს არ მიაღწევენ საქართველოში – ხელისუფლების ცვლილებას. თუმცა, ალბათ დიდხანს მოუწევთ ლოდინი“- წერს ექსპერტი და აღნიშნავს, რომ წნეხი გლობალისტებისგან, საგამოძიებო კომისიის საბოლოო დასკვნის მოახლოებასთან ერთად, უფრო იმატებს. მისი თქმით, ამ ხერხით უცხოელი აქტორები ქუჩის აქციების გააქტიურებას ცდილობენ, თუმცა არ გამოსდით, რადგან მმართველი გუნდი სიმართლით გაჯერებულ ინფორმაციას უკვე წლებია აწვდის საზოგადოებას.
“რაც უფრო ახლოვდება პარლამენტის დროებითი კომისიის საბოლოო დასკვნა, მით უფრო ძლიერდება გლობალისტებისგან წნეხი საქართველოს ხელისუფლებაზე. დიდი ბრიტანეთი სანქციების ფერხულში ჩაება და ორი ქართველი მოსამართლე ყოველგვარი მტკიცებულების გარეშე დაასანქცირა. ასეთი “გაფრთხილებები” დასავლეთიდან გაგრძელდება მანამ, სანამ სასურველ შედეგს არ მიაღწევენ საქართველოში – ხელისუფლების ცვლილებას. თუმცა, ალბათ დიდხანს მოუწევთ ლოდინი.
„ნაციონალური მოძრაობის” საბრალდებო დასკვნა დასავლეთის გლობალისტების განაჩენიცაა, ამიტომ ცდილობენ სანქციებით და სხვა ფორმებით მაქსიმალურად მოახდინონ ზეწოლა ხელისუფლებაზე და როგორმე აანთონ ცეცხლი ქუჩის აქციებზე. თუმცა, ჯერჯერობით არც მთავრობა ჩანს შეშინებული და არც ნაპერწკალი ჩანს ქუჩაში სადმე, რომ ცეცხლი აგიზგიზდეს. გლობალისტებს ივანიშვილის გუნდმა დაასწრო და საზოგადოებას სიმართლით გაჯერებულ ინფორმაციას უკვე რამდენიმე წელია განუწყვეტლივ აწვდის, რამაც შედეგი გამოიღო. ოპოზიციის აქციებზე არათუ ნეიტრალური ხალხის, არამედ, საკუთარი მხარდამჭერების კლებაც დაიწყო.
პარლამენტის დროებითმა საგამოძიებო კომისიამ ამერიკის ახალი დეპარტამენტის დუმილიც კი დაარღვია, საქართველოზე ზოგადი და ორაზროვანი შეფასება უკვე მოვისმინეთ. მოველით, კიდევ უფრო მეტი აქტორი გამოჩნდება ამ პერიოდში, რომლებიც ღიად გაყიდიან საკუთარ თავს და ქართველ ხალხს კიდევ ერთხელ დაანახებენ, თუ სად იკარგებოდა უსამართლო სამართლიანობა მთელი ამ განვლილი წლების განმავლობაში,“– წერს თამარ ჩიბურდანიძე სოციალურ ქსელში.