ლიეტუვის ეკონომიკისა და ინოვაციების სამინისტრომ წარმოადგინა 20 მილიონი ევროს ღირებულების სამოქმედო გეგმა, რომელიც დაეხმარება აშშ-ის მიერ დაწესებული ტარიფებით დაზარალებულ საწარმოებს.
ლიეტუვის ეკონომიკისა და ინოვაციების სამინისტროს მონაცემებით, 1041 კომპანია ახორციელებს ექსპორტს ლიეტუვიდან აშშ-ში, ძირითადად ესენი არიან ნავთობპროდუქტების, ავეჯისა და ნედლეულის ექსპორტიორები. დაახლოებით 100 ლიეტუვური კომპანიისთვის აშშ-ში ექსპორტი შეადგენს მათი მთლიანი ბრუნვის ნახევარზე მეტს.
ლიეტუვის ეკონომიკის მინისტრის, ლუკას სავიცკასის თქმით, აშშ-ის მიერ ევროკავშირიდან იმპორტზე დაწესებულმა ტარიფებმა, შეიძლება, შეამციროს ლიეტუვის ეკონომიკური ზრდა 0.65%-ით სამი-ოთხი წლის განმავლობაში.
მისი თქმით, ტარიფების გავლენა ლიეტუვის ეკონომიკაზე იქნება „კიდევ უფრო მნიშვნელოვანი“, თუ ტარიფები გრძელვადიანი იქნება.
ლიეტუვის ეკონომიკის მინისტრის განცხადებით, იმედი აქვს, აშშ და ევროკავშირი, რომელიც ამზადებს საპასუხო ზომებს, მიაღწევენ შეთანხმებას და ტარიფები უახლოეს მომავალში გაუქმდება.