დედაქალაქის მთავარ სატრანსპორტო კვანძზე გადაადგილება დღეიდან უფრო მარტივია, ხოლო მანძილის დაფარვა ნაკლებ დროშია შესაძლებელი. გმირთა მოედნისა და ლაგუნა ვერეს მიმდებარე ტერიტორიას, სადაც დროის ნებისმიერ მონაკვეთში საცობი იყო, ახალი საავტომობილო ზოლი დაემატა.
სარეკონსტრუქციო სამუშაოების დასრულებას ორი თვე დასჭირდა. რეაბილიტაცია ჩაუტარდა გმირთა მოედნიდან სანაპირომდე არსებულ 32 000 კვადრატული მეტრის გზის ფართობს. დაიგო ასფალტის ახალი საფარი და სრულად განახლდა გარე განათების სისტემა. ნაკადების მართვის მიზნით, შემუშავდა ტრანსპორტის მოძრაობის სქემაც. ავტომობილების გადაადგილებას ხელოვნური ინტელექტის სისტემაზე შექმნილი შუქნიშნები არეგულირებს.
პროექტის განხორციელების მიზნით, ლაგუნა ვერეს მიმდებარე ტერიტორიიდან კომერციული ობიექტების დემონტაჟი განხორციელდა. გზის სავალი ნაწილის რეაბილიტაციის გარდა, გამოიცვალა მიწისქვეშა კომუნიკაციები, ზოოპარკის მიმდებარე ტერიტორიაზე დაიხაზა ზებრა გადასავლელები. ჩატარდა გამწვანებითი სამუშაოები.
სარეაბილიტაციო სამუშაოებისთვის დედაქალაქის მერიამ ბიუჯეტიდან 9 მილიონ ლარზე მეტი გამოყო.
