„საქართველოს გარეშე, ამ გეგმების ხორცშესხმას მომავალი არ უწერია,“ – ასე ეხმიანება სოციალურ ქსელით პარტია „ხალხის ძალის“ წევრი დავით ქართველიშვილი ბაქოში „მწვანე ენერგეტიკული დერეფნის“ შესახებ აზერბაიჯანს, საქართველოს, თურქეთსა და ბულგარეთს შორის მემორანდუმზე ხელმოწერის ფაქტს.
ექსპერტის თქმით, სწორედ ასეთი პროექტები აკავშირებს საქართველოს ევროკავშირის ჯანსაღ ნაწილთან და აღმოსავლეთ პარტნიორებთან.
„გუშინწინ ბაქოში ხელი მოეწერა მემორანდუმს აზერბაიჯანს, საქართველოს, თურქეთსა და ბულგარეთს შორის „მწვანე ენერგეტიკული დერეფნის“ შესახებ. აზერბაიჯანის პრეზიდენტმა ილჰამ ალიევმა ხაზგასმით აღნიშნა, რომ 2030 წლისთვის უცხოელ ინვესტორებთან გაფორმებული კონტრაქტები მზის და ქარის ელექტროსადგურებზე, აზერბაიჯანს 6 გიგავატი სიმძლავრის ქარისა და მზის ენერგიით უზრუნველყოფს.
ბაქოში გამართულ პრესკონფერენციაზე, ევროკომისარმა ენერგეტიკისა და საბინაო საკითხებში დენ იორგენსენმა აღნიშნა, რომ ევროკავშირი და აზერბაიჯანი აქტიურად თანამშრომლობენ „მწვანე ენერგეტიკული დერეფნის“ სფეროში. ევროკომისარმა და აზერბაიჯანის ენერგეტიკის სამინისტროს ხელმძღვანელმა პარვიზ შაჰბაზოვმა მონაწილეობა მიიღეს მრგვალ მაგიდაში „აზერბაიჯანი-ევროპული კავშირი“ თემაზე „ზღვის ქარის ენერგიის განვითარება“.
ზღვის ქარის ენერგიაზე აქცენტი შემთხვევითი არ არის, რადგან მისი პოტენციალი შეფასებულია 157 გვტ სიმძლავრეში. ზღვის ქარის ენერგიის განვითარების საწყის ეტაპზე, მწვანე ენერგეტიკული დერეფნის „კასპია-შავი ზღვა-ევროპა“ (რუმინეთი და ბულგარეთი) მეშვეობით, ევროპაში 4 გიგავატი ელექტროენერგიის ექსპორტი იგეგმება. რა თქმა უნდა, ამ ამბიციურ პროექტში საქართველოს ერთ-ერთი საკვანძო როლი ეკისრება.
რუმინეთის ენერგეტიკის მინისტრმა სებასტიან-იოან ბურდუჯამ ჟურნალისტებთან საუბრისას პროექტი 10 მილიარდ ევროდ შეაფასა და განაცხადა, რომ ხარჯების მნიშვნელოვანი ნაწილი ევროკავშირის გრანტებით დაიფარება. სწორედ ეს არის ის „რეალური პოლიტიკა“ და „გეო-ეკონომიკა“, რომელიც საქართველოს ევროკავშირის ჯანსაღ ნაწილთან და თავის აღმოსავლეთ პარტნიორებთან აკავშირებს. და რაც მთავარია – საქართველოს გარეშე, ამ გეგმების ხორცშესხმას მომავალი არ უწერია,“ – წერს დავით ქართველიშვილი.