“მამუკა ხაზარაძის განცხადებები ერთ მიზანს ემსახურება, რომ პოლიტიკურ პროცესში მონაწილეობით დაფაროს ის უამრავი დანაშაული, რომელიც მან წარსულში ჩაიდინა”

საქართველოს პარლამენტის კულტურის კომიტეტის თავმჯდომარემ, გიორგი გაბუნიამ „ლელოს“ ლიდერის, მამუკა ხაზარაძის განცხადების შესახებ დასმულ კითხვას უპასუხა, რომ „ 7 თვით ადრე, დღის წესრიგში ადგილობრივი არჩევნების საკითხის შემოტანა არის ბიძინას სცენარის შეგნებულად, თუ შეუგნებლად გატარება!“

როგორც გაბუნია აღნიშნავს, ხაზარაძე პირველ რიგში, არის კანონდამრღვევი, რომელმაც უნდა აუხსნას საზოგადოებას და სასამართლოს, თუ რატომ დაარღვია კანონი.

„მე ვფიქრობ, მამუკა ხაზარაძე, პირველ რიგში, გახლავთ კანონდამრღვევი და მას მოვუწოდებ, რომ დაემორჩილოს კანონს. მას საფიქრალი აქვს ის, რომ კარგად აუხსნას საზოგადოებას და მათ შორის, სასამართლოს თუ რატომ დაარღვია კანონი. შესაბამისად, მისი განცხადებები ერთ მიზანს ემსახურება, რომ პოლიტიკური სარჩულის და პოლიტიკურ პროცესში მონაწილეობით დაფაროს ის უამრავი დანაშაული, რომელიც მან წარსულში ჩაიდინა. შესაბამისად, მისი განცხადება ჩემთვის არ არის საინტერესო. „ქართული ოცნება“ გეგმავს წინასაარჩევნო პროცესის დაწყებას უახლოეს მომავალში. ჩვენ გველის მნიშვნელოვანი არჩევნები, ადგილობრივი თვითმმართველობის არჩევნები და მე დარწმუნებული ვარ, რომ „ქართული ოცნება“ სამოცდაოთხივე მუნიციპალიტეტში დამაჯერებელ გამარჯვებას და საზოგადოების კიდევ ერთ მყარ ნდობას მოიპოვებს. ამიტომ ჩემთვის ეს განცხადება ნაკლებად საინტერესოა“.-აღნიშნა გიორგი გაბუნიამ.

გაბუნიამ ასევე, თვითმმართველობის არჩევნების საკითხთან დაკავშირებით ოპოზიციაში არსებულ უთანხმოებაზე ისაუბრა და აღნიშნა, რომ „ოპოზიციაში დაპირისპირება არის სრული ფარსი“.

„საზოგადოებამ ეს კარგად იცის. ეს არის რეალურად ერთი პარტიის ქვეშ მოქმედი ქვედანაყოფები, ერთი პარტიის სტრუქტურული ერთეულები გახლავთ, რომელთაც აქვთ ერთი მიზნები და ამოცანები, გარე დაფინანსებით შექმნან საქართველოში სამოქალაქო დაპირისპირება და განავითარონ რევოლუციური სცენარი, რათა შემდეგ უკვე ხელისუფლებაში მოსვლის შემთხვევაში შეასრულონ გარე დავალებები“-განაცხადა გიორგი გაბუნიამ.