უსამშობლოების უცხოელი პატრონებიც მიხვდნენ, რომ საპარლამენტო არჩევნების ხელახლა ჩატარებას აზრი არ აქვს, გადაერთნენ ადგილობრივ არჩევნებზე, – ამის შესახებ პარლამენტის დიასპორის საკითხთა კომიტეტის თავმჯდომარემ, ირაკლი ზარქუამ განაცხადა.
მისი თქმით, „დიფსთეითი“ ამერიკულიდან ევროპაში გადმოინაცვლა და „იუესეიდი“ ბრიტანულმა ფონდებმა ჩაანაცვლა.
„ბრიტანეთის საგარეო საქმეთა სამინისტრომ საგრანტო კონკურსი გამოაცხადა, 2025 წლის ოქტომბერში ჩასატარებელ არჩევნებზე გრანტები გაიცეს. მინდა, თქვენი ყურადღება ორ ასპექტზე გავამახვილო. პირველი, ამ უსამშობლოების უცხოელი პატრონებიც მიხვდნენ, აზრი არ აქვს, საპარლამენტო არჩევნები ხელახლა ჩატარდეს და უკვე გადაერთნენ ადგილობრივ არჩევნებზე. ეს კარგია, იმედია, ადგილობრივებიც გაიაზრებენ, რომ მათი პატრონები ამას უკვე მიხვდნენ და დასკვნაც გამოიტანეს. რაც შეეხება მეორე ასპექტს, „იუესეიდი“ უკვე ჩაანაცვლა ბრიტანულმა ფონდებმა. სხვათა შორის, მინდა, შევნიშნო, რომ ზუსტად ამასთან დაკავშირებით ბატონ შათირიშვილს ჰქონდა საუბარი თავის წერილში, რომ „დიფსთეითმა“ ამერიკულიდან ევროპაში გადმოინაცვლა. „იუესეიდმა“ ჩაანაცვლა ბრიტანულმა, ესტონურმა ფონდებმა. კიდევ ერთი უსამშობლოების ორგანიზაცია არის კაპიტან გიგაურის ორგანიზაცია, უკვე ესტონეთიდან ფინანსდება. უსამშობლოების და აგენტურის გაერთიანება, რომელიც დღემდე არ აქვეყნებს თავის მონაცემებს – „ისფედი“, ვითომ, ალტერნატიული დათვლები მოიგონეს, უკვე ფინანსდება და გრანტი გამოუყო ბრიტანულმა ფონდმა. ვიცით, ვინ რას წარმოადგენს, ვინ რისკენ იღვწის, ეს არის, რომ ისევ ქაოსი და რევოლუციური სცენარები დათესონ ადგილობრივ არჩევნებზე, მაგრამ არ გამოუვათ. ჩვენ, როგორც მთავრობა, ისე ხალხი, ფხიზლად ვართ, ვიცით, ვის რა ინტერესები აქვს. უსამშობლოები შედეგს ვერ მიაღწევენ, გამორიცხულია“, – განაცხადა ირაკლი ზარქუამ.
დიდი ბრიტანეთის საგარეო საქმეთა სამინისტრო აცხადებს საგრანტო კონკურსს საქართველოში 2025 წლის ოქტომბრისთვის დაგეგმილი თვითმმართველობის არჩევნების მხარდასაჭერად. როგორც საგარეო უწყების ვებგვერდზე გამოქვეყნებულ განცხადებაშია აღნიშნული, თანამეგობრობისა და განვითარების ოფისი (FCDO) იწვევს ქართულ არაკომერციულ ორგანიზაციებს, 2025 წლის 25 აპრილამდე წარადგინონ განაცხადები 2025 წლის ოქტომბერში დაგეგმილი ქართული მუნიციპალური არჩევნების ეფექტურ ჩატარებაში მხარდასაჭერად.