პარლამენტის ფრაქცია “ქართული ოცნების” თავმჯდომარის მოადგილის, ლევან მაჭავარიანის თქმით, ოპოზიცია თავისი ნებით ვერ მიიღებს გადაწყვეტილებას, მიიღოს თუ არა თვითმმართველობის არჩევნებში მონაწილეობა.
მისი თქმით, ისინი უცხოურ ინსტრუქციებს ელოდებიან.
“მათი გადასაწყვეტი რომ იყოს, რა თქმა უნდა, ამ არჩევნებში მონაწილეობას არ მიიღებენ, რადგან იციან, რომ მათი რეიტინგი არის დრამატულად შემცირებული და 64-ვე მუნიციპალიტეტში გამანადგურებელი ანგარიშით დავამარცხებთ ჩვენ, რომელსაც უკვე საშტაბო მუშაობაც დაწყებული გვაქვს ამ არჩევნებთან დაკავშირებით. ვხედავთ, როგორი ქაოსიც არის ოპოზიციაში, ერთმანეთს აბრალებენ თავიანთ წარუმატებლობას, თვითონ პარტიებში არის სერიოზული დაპირისპირება, ვინაიდან ისინი ქუჩაში დარჩნენ, ტყუილებიც არ გამოუვიდათ არჩევნების გაყალბებასთან დაკავშირებით და ერთი მტკიცებულება ვერ დადეს. მოსახლეობას მინდა შევახსენო, რომ ეს მათი გადასაწყვეტი არ არის. როგორი ინსტრუქციაც წამოვა და ეს ინსტრუქციები ჯერჯერობით იგვიანებს, ვინაიდან მათი გარე უფროსები დაკავებულები არიან გაცილებით მსხვილი პრობლემებით. როდესაც ეს ინსტრუქციები წამოვა, ზედმიწევნით მოუწევთ შესრულება.
თუ მათ ექნებათ უფლება, რომ მიიღონ ამ არჩევნებში მონაწილეობა, მათი გადასაწყვეტი რომ იყოს არ მიიღებდნენ, ვინაიდან არ სურთ, რომ იყოს ლუსტრირებული მათი რეალური რეიტინგი, მაგრამ მათზე ეს დამოკიდებული არ არის და უნდა მიჰყვნენ იმ ბრძანებას, რა ბრძანებაც წამოვა უცხოელი უფროსებისგან,” – აღნიშნა ლევან მაჭავარიანმა.