პარლამენტის ფრაქცია “ქართული ოცნების“ თავმჯდომარის პირველი მოადგილის, ირაკლი კირცხალია განცხადებით, “პატრონების მხრიდან ბინძური დავალების შესრულება პირველებს ბატონ ჯაფარიძეს და ბატონ ხაზარაძეს ეგოთ წილად”.
მისი განმარტებით, საგამოძიებო კომისიაზე არმისვლა არის ბინძური დავალება, რათა პატივი არ სცენ სახელმწიფოებრიობას და სახელმწიფო ინსტიტუტებს.
“მათი პატრონების მხრიდან პირდაპირ დავალების შესრულებაა, რომელიც პირველი ბატონ ჯაფარიძეს და ბატონ ხაზარაძეს ეგოთ. ეს არის ერთი ძალიან ბინძური დავალება, რომ პატივი არ სცენ სახელმწიფოებრიობას და სახელმწიფო ინსტიტუტებს. დამერწმუნეთ, ამას ძალიან ადეკვატური პასუხი გაეცემა სახელმწიფოსგან. რაც შეეხება მათ არმონაწილეობას, თავის არიდებას იმ მნიშვნელოვან კითხვებზე, რაც ისმევა საგამოძიებო კომისიაზე, ამან მოახდინა მათი ძალიან მკაფიო ლუსტრაცია. რეალურად, მათ ამ პოლიტიკური ნაბიჯით დაადასტურეს, რომ ისინი იყვნენ იმ სისტემის ერთ-ერთი აღმასრულებელი რგოლი, თავისივე ერთ-ერთი ფინანსური ინსტიტუტით, რომელიც პირდაპირ იყო ჩართული ოჯახების განადგურებით, ბიზნესების რეკეტით და ა.შ. რაც შეეხება სამართლებრივ პროცესს, რომელსაც ასევე ყურადღებით ვადევნებთ თვალ-ყურს, სასამართლო და პროკურატურა ჩართულია და ვნახოთ თუ რა გადაწყვეტილება იქნება მიღებული”, – განაცხადა ირაკლი კირცხალიამ.