მეფე დავით აღმაშენებლის მიერ აშენებული გელათის მონასტერი გაერთიანებული საქართველოს სიმბოლოა, ქრისტიანულ ღირებულებებზე დაფუძნებული ქართული საზოგადოების, და ეს მონასტერი გვავალდებულებს, განსაკუთრებით ვიზრუნოთ იმ საგანძურის შენარჩუნებაზე, მოვლაზე, რომელიც მემკვიდრეობით გვერგო დიდი მეფისგან, – ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა, შიომ (მუჯირი) გელათის მონასტრის კედლის მხატვრობისა და მოზაიკის საკონსერვაციო პროგრამების განხორციელებასთან დაკავშირებულ ღონისძიებაზე სიტყვით გამოსვლისას განაცხადა.
აქედან გამომდინარე, მისი თქმით, ბუნებრივია, რომ ძალიან დიდია საზოგადოებაში ინტერესი გელათის რეაბილიტაციის მიმართ.
„გულითადად მოგესალმებით და სრულიად საქართველოს კათოლიკოს-პატრიარქის, ილია მეორის სახელით მადლობას გიხდით მობრძანებისთვის და იმ გულისხმიერებისთვის, რომელსაც იჩენთ გელათის რეაბილიტაციის პროცესისადმი. როგორც იცით, წელს საქართველოში აღინიშნება წმინდა მეფე დავით აღმაშენებლის გარდაცვალებიდან 900 წლისთავი და მოგეხსენებათ, რა დიდ მნიშვნელობას ანიჭებდა წმინდა მეფე საქართველოს გაერთიანებას, გამთლიანებას. ამდენად, მის მიერ აშენებული გელათის მონასტერი არის სიმბოლო გაერთიანებული საქართველოსი, ქრისტიანულ ღირებულებებზე დაფუძნებული ქართული საზოგადოების, და ეს მონასტერი გვავალდებულებს, რომ განსაკუთრებით ვიზრუნოთ იმ საგანძურის შენარჩუნებაზე, მოვლაზე, რომელიც მემკვიდრეობით გვერგო დიდი მეფისგან. ბუნებრივია, რომ ძალიან დიდია ინტერესი საზოგადოებაში გელათის რეაბილიტაციისადმი და დღეს ჩვენ გვაქვს პატივი მოვუსმინოთ ორ შესანიშნავ სპეციალისტს, რომლებიც არიან საერთაშორისოდ, საქვეყნოდ აღიარებულები – ბატონ სტივენ რიკერბის და ბატონ რობერტო ნარდის. ბატონო რობერტო გაგვაცნობს მოზაიკის კომპოზიციისთვის ჩატარებული კვლევითი საკონსერვაციო სამუშაოების ერთი წლის შედეგებს, გელათის მოზაიკის ამჟამინდელ მდგომარეობას და მის ბუნებას; ხოლო ბატონი სტივენი ისაუბრებს მონასტრის მხატვრობაზე განხორციელებული საკონსერვაციო სამუშაოების სამეცნიერო კვლევების შესახებ და გაგვაცნობს იმ პროცესში შერჩეულ მეთოდოლოგიას და პრინციპებს. ჩვენ გვჯერა, რომ ისინი მთელი გულმოდგინებით და მართებული სამეცნიერო მიდგომებით აღასრულებენ, აი, ამ დიდ სამუშაოს. ეს შრომატევადი და ურთულესი საქმე, ღვთის შეწევნით, დაგვირგვინდება დიდი წარმატებით და ყველანი ერთად გავიხარებთ“, – განაცხადა მეუფე შიომ.