მოკლულ, ნაწამებ და უფლებაშელახულ პირთა ოჯახის წევრების მონაყოლმა კიდევ ერთხელ მთელი სიმძაფრით გაახსენა ქართულ საზოგადოებას, თუ რა სასტიკი ფორმებით ამართინებდნენ ქვეყანას ახალგაზრდა აგენტურას – სააკაშვილს და მის თანაგუნდელებს მათი უცხოელი პატრონები, – ნათქვამია „ერთიანი ნეიტრალური საქართველოს“ განცხადებაში.
ვრცელ განცხადებაში მიმოხილულია პარლამენტის დროებითი საგამოძიებო კომისიის სხდომებზე მოსმენილი ინფორმაცია, „ნაციონალური მოძრაობის“ ხელისუფლების ქმედებები და აღნიშნულია, რომ „ქართველმა ხალხმა ეს „პოლიტიკური განტოლება“ წარმატებით ამოხსნა და ჩვენი საზოგადოების მოტყუება აგენტურას აღარ გამოუვა“.
„2012 წელს ხელისუფლებაში მოსული “ქართული ოცნების” დაპირება, ქართველი ხალხის მიმართ იყო – სამართლიანობის აღდგენა და რეჟიმის გასამართლება, რომელიც აწ უკვე გასაგები მიზეზების გამო ამდენი ხნის მანძილზე სრულყოფილად ვერ შედგა. მართალია დაგვიანებით, მაგრამ საქართველოს პარლამენტში შეიქმნა დროებითი საგამოძიებო კომისია, რომლის მთავარი მიზანი „ნაციონალური მოძრაობის“ ძალადობრივი რეჟიმის შეფასება და დამნაშავე პოლიტიკური პარტიის, ასევე მისი სატელიტების გასამართლებაა. ქართულ საზოგადოებაში დიდი ვნებათაღელვა გამოიწვია კომისიის სხდომებზე განხილულმა უმძიმესმა თემებმა, დაზარალებულთა ჩვენებებმა, რადგან მოკლულ, ნაწამებ და უფლებაშელახულ პირთა ოჯახის წევრების მონაყოლმა კიდევ ერთხელ მთელი სიმძაფრით გაახსენა ქართულ საზოგადოებას, თუ რა სასტიკი ფორმებით ამართინებდნენ ქვეყანას ახალგაზრდა აგენტურას – სააკაშვილს და მის თანაგუნდელებს მათი უცხოელი პატრონები.
საზოგადოება თითქმის ყოველ დღე თვალს ადევნებს და ისმენს კომისიის სხდომებზე არაერთ საზარელ და შემაძრწუნებელ ისტორიას. ვიკვლევთ ნაციონალური მოძრაობის რეჟიმის მმართველობის დროს ჩადენილი დანაშაულების სისასტიკეს, თუმცა 2008 წლის აგვისტოს ომის, ამ ომში კი, სააკაშვილის და მისი ხელისუფლების მიერ ჩადენილი დანაშაული ქვეყნისა და ქართველი ხალხის წინაშე მაინც ის მთავარი საქმეა, რომლის გამოც რეჟიმი აუცილებლად შეფასდება ანტიქართულ, საკუთარი მოსახლეობის მიმართ მტრულად განწყობილ და მოქმედ კრიმინალურ ხელისუფლებად და აღარაფერი დაუდგება წინ, მაშინდელი მმართველი პარტიის და მისი სატელიტების აკრძალვას და მათ სამუდამოდ განდევნას ქართული პოლიტიკური ველიდან.
იმის მიუხედავად, რომ საზოგადოების წინაშე ყველაფერი ხელის გულზე დევს, მიუხედავად იმისა, რომ „ნაცმოძრაობის“ რეჟიმის მსახურებიც კი, ვინც კომისიაზე მოსვლა გაბედა, პირდაპირ თუ ირიბად თავადვე ადასტურებენ, რომ ეს იყო უმძიმესი პროვოკაცია, რომელიც სააკაშვილმა გარედან მიღებული დავალების შესაბამისად შეასრულა და ქვეყანა ომის ქარ-ცეცხლში გახვია, მაინც არსებობენ საზოგადოებაში ადამიანთა მცირერიცხოვანი ჯგუფები, რომლებიც ბედავენ და ომის გაჩაღებას, საკუთარი ხალხისა და ქვეყნის წინაშე ჩადენილ უდიდეს ღალატს არათუ გამართლებას უძებნიან, პირიქით, კომისიის წევრებს და ხელისუფლებას ადანაშაულებენ ანტისახელმწიფოებრივ ქმედებებში. იმდენს ბედავენ, რომ მათი ღალატის შედეგად გარდაცვლილი გმირების გვარებს სპეკულაციებისათვის იყენებენ და კიდევ ერთხელ, ამჯერად საფლავებში აყენებენ შეურაცხყოფას ქართველ სამხედროებს.
ცხადია, ადამიანთა მცირე ჯგუფში, ვინც წინა, კრიმინალურ ხელისუფლებას ექომაგება, ამ ხელისუფლების ჯერჯერობით თავისუფლებაზე მყოფ „პოლიტიკოსებს“ არ ვგულისხმობთ. ისინი მძიმე დანაშაულთა უშუალო თანამონაწილენი არიან და გასაკვირი არ არის, რომ თავის მართლებას ყველანაირი ბინძური ფორმით ცდილობენ. ამ შემთხვევაში საუბარი გვაქვს სააკაშვილის მაშინდელ ოპოზიციაზე, რომელიც რეალურად, რამდენიმე პატრიოტი ადამიანის გამოკლებით, თავად სააკაშვილის და უცხოელი პატრონების მიერ მართული „ოპოზიციონერები“ იყვნენ და რეჟიმს დემოკრატიული მმართველობის აღსაქმელად, ოპოზიციონერებად ლეღვის ფოთოლივით ეფარებოდნენ. ჩვენი ყურადღების მიპყრობა ამ საკითხის მიმართ ერთ-ერთი სტაჟიანი აგენტის, თინა ხიდაშელის გუშინწინდელმა განცხადებამ გამოიწვია. სააკაშვილის რეჟიმის ფსევდოოპოზიციური დაჯგუფების წარმომადგენელმა შემდეგი რამ თქვა: – „ჩვენი ქვეყნის დამოუკიდებლობის ისტორიაში იყო მომენტები, როდესაც ერთად იდგა, ერთიანი იყო ქართული საზოგადოება. ერთ-ერთი ასეთი ბოლო დღე იყო 2008 წლის 8 აგვისტო, როდესაც ყველა ოპოზიციურმა პარტიამ ერთხმად, ერთად გააკეთა განცხადება.“ ზუსტად ანალოგიური განცხადება აქვს გაკეთებული 2008 წლის ომის შემდეგ მის ქმარს, ასევე სტაჟიან აგენტს, დავით უსუფაშვილს – „ასეთ მძიმე ვითარებაში ჩვენი ვალია რომ ვიყოთ მოწოდების სიმაღლეზე და სახელმწიფო ინტერესების დასაცავად ყველა, პოზიცია და ოპოზიცია ვიყოთ ერთად“. სწორედ ამ განცხადების შემდეგ, უსუფაშვილმა საკუთარ თავზე აიღო ეგრეთწოდებული ოპოზიციის „კონსოლიდაცია“ და თითქმის ყველა მაშინდელი პოლიტიკოსი, რომელიც თავს რეჟიმის წინააღმდეგ მებრძოლად წარმოაჩენდა, ომის გამჩაღებელი რეჟიმის გარშემო გაერთიანდა.
უსუფაშვილის შემდეგ ანალოგიური განცხადება გააკეთა მაშინდელმა ფსევდოოპოზიციონერმა, გიორგი თარგამაძემ. პარლამენტის ტრიბუნიდან მან რეჟიმს მხარდაჭერა გამოუცხადა და მის კოლეგებს, დანარჩენ ფსევდოოპოზიციონერებს მოუწოდა, რომ იდგა ერთიანობის დრო. სხვათა შორის, ეს ის თარგამაძეა, რომელმაც ომიდან რამდენიმე თვეში, „ოპოზიციონერის“ მანტიაში გახვეულმა მოღალატეობრივ რეზოლუციას მხარი დაუჭირა, საერთაშორისო დოკუმენტებში სააკაშვილის რეჟიმის მხრიდან ომის დაწყება დაადასტურა, დოკუმენტს ხელი მოაწერა და ქართველი ჯარისკაცები სამხედრო დანაშაულის გასამართლებისთვის გაწირა. საზოგადოებისთვის კარგად არის ცნობილი, რომ არა „ქართული ოცნების“ ხელისუფლების ძალისხმევა, რომ არა მუხლჩაუხრელი შრომა სტრასბურგისა და ჰააგის სასამართლოებში, პროცესები შესაძლოა ქართველი ჯარისკაცებისთვის უმძიმესი სცენარით განვითარებულიყო.
დღევანდელი გადმოსახედიდან კიდევ უფრო მარტივია მსჯელობა და ანალიზი იმისა, თუ როგორ დაულაგეს უცხოელმა პატრონებმა სააკაშვილს 2008 წლის დავალების შესრულების და ომის გაჩაღების შემდეგ გადარჩენის „სპეცოპერაცია“. მათ გასცეს დავალება და მათ მიერვე მართული ფსევდოოპოზიცია სრულად გამოიყვანეს იმჟამინდელი ხელისუფლების ყალბი ოპონირების რეჟიმისგან. ეს მისია კი საკუთარ თავზე სწორედ დავით უსუფაშვილმა აიღო. სწორედ მისი უშუალო ხელმძღვანელობით, გარედან მიღებული დავალების შესაბამისად შექმნეს ილუზია და განცდა, რომ იმ მომენტში კრიტიკული აზრის გამოხატვა, რეჟიმის მისამართით კითხვების დასმა და ომის თემაზე მათთვის არასასურველ კონტექსტში საუბარი მორალური დანაშაული იყო. სადაო არ არის, რომ უშუალოდ საომარი მოქმედებების დღეებში პოლიტიკოსის მხრიდან ომში მყოფი ხელისუფლების კრიტიკა არ იქნებოდა სწორი, ვისი დაწყებულიც უნდა ყოფილიყო შეიარაღებული დაპირისპირება, მაგრამ საინტერესოა, ომიდან 4 და 5 თვის შემდეგ რატომ გააგრძელეს იგივე რიტორიკა უსუფაშვილმა, ხიდაშელმა, თარგამაძემ და მათ გვერდით მყოფმა პოლიტიკოსებმა? ვის ან რის გარშემო იყვნენ გაერთიანებულები? პასუხი მარტივია – მაშინდელ ხელისუფლებასაც და ოპოზიციის დიდ ნაწილსაც ერთი პატრონი ჰყავდათ, დავალებებს ქვეყნის გარედან იღებდნენ და იმ მომენტში, როდესაც აგენტი პრეზიდენტი იყო გადასარჩენი, ყალბი კონსოლიდაციის დავალება მიიღეს და ეს დავალება პირნათლად შეასრულეს. გაერთიანდნენ იმიტომ, რომ თავად იყვნენ მონაწილე იმ დავალების აღსრულების, რასაც საკუთარ ქვეყანაში, საკუთარ ტერიტორიაზე ომის გაჩაღება და საქართველოს ისტორიული მიწების ოკუპაცია მოჰყვა შედეგად. ფსევდოოპოზიციონერებმა სწორედ ყალბი ერთიანობით სცადეს როგორმე გაემართლებინათ მათ მიერ შესრულებული უმძიმესი დავალება, რომელიც ქართული სახელმწიფოს და ქართველი ხალხის წინაშე ღალატის ტოლფასია.
მართული ოპოზიციის მსგავსად, სააკაშვილს ფსევდოკრიტიკული მედიაც სჭირდებოდა. ზოგადად, აგენტურული მმართველობის ერთ-ერთი დამახასიათებელი ნიშანთვისება ილუზორული, პარალელური სამყაროს შექმნა და ამ სამყაროში, პროპაგანდით გაბრუებული საზოგადოების მარტივად მართვაა, რასაც ზედმიწევნით ზუსტად აკეთებდა მაშინდელი რეჟიმი. ყოფით, ნაკლებად პრობლემურ საკითხებში მაშინდელმა ხელისუფლებამ ფსევდოოპოზიციური მედიის როლი ტელეკომპანია „კავკასიას“ განუსაზღვრა და პარალელურად წამოიწყო ბრძოლა “მაესტროს” ხელში ჩაგდების მიზნით, რომელიც სრულად კონტროლირებად მედიასივრცეში, თავისუფალი სიტყვის კუნძულად რჩებოდა. გარკვეულ ეტაპზე რეჟიმის სატელიტების მეშვეობით მოახერხეს “მაესტროზე” გავლენის მოპოვება და მას “კავკასიის” მსგავსად იყენებდნენ წარმოსახვითი განცდის შესაქმნელად, რომ თითქოს ქვეყანაში არსებობდა კრიტიკული მედია და შესაბამისად, ისმოდა კრიტიკული აზრი. მაგრამ როგორც აღინიშნა, ეს მხოლოდ უმნიშვნელო, მათი ხელისუფლებისთვის ნაკლებად პრობლემურ საკითხებს ეხებოდა. აი მაშინ, როდესაც დადგა მომენტი და სააკაშვილს რეალურად დაუპირისპირდა მისი ყოფილი თანაგუნდელი ნინო ბურჯანაძე, რომელიც იმ მომენტში არ განეკუთვნებოდა სააკაშვილის პატრონების მართულ პოლიტიკურ ელიტას და არ იჯდა უცხოეთში დაწერილ სცენარში – მას სწორედ ეგრეთწოდებული კრიტიკული ტელეკომპანია, „კავკასია“ და ნაწილობრივ კონტროლირებული “მაესტრო” დაუპირისპირეს.
სააკაშვილს იმ მომენტში სასწრაფოდ სჭირდებოდა მისი პატრონების კონტროლს მიღმა შექმნილი ოპოზიციური გაერთიანების, „სახალხო კრების“ დისკრედიტაცია. გამომდინარე იქიდან, რომ ღიად რეჟიმის მხარდამჭერი მედიები ამას ნაკლებად მოახერხებდნენ, საქმეში სწორედ ფსევდოკრიტიკული ტელევიზიები ჩართეს, ჯერ „სახალხო კრების“ აქციების გაშუქება შეწყვიტეს, ხოლო შემდეგ პოლიტიკური გაერთიანების დისკრედიტაციის მიზნით, აწ უკვე საკუთარ ბუნებრივ ადგილას ანუ სააკაშვილის წიაღში დაბრუნებული ირაკლი ოქრუაშვილის მიერ კონტროლირებულმა ტელეკომპანია „მაესტრომ,“ სიბინძურესა და ტყუილებზე აგებული რეპორტაჟების მომზადება და გავრცელება საკუთარ თავზე აიღო. მაშინ, ქალბატონი ბურჯანაძე აცხადებდა: „მაესტროს” შეკითხვებმა “რეალTV”-ისა და სახელისუფლებო ტელევიზიების კითხვებს გადაასწრო. მივმართავ “მაესტროს” ჟურნალისტებს, რომ გაიგონ თუ რატომ აღარ გადაიცემა პირდაპირ ეთერში საპროტესტო აქციები“. გარედან დაწერილი ამ სცენარის ერთადერთი მიზანი მათ მიერ არაკონტროლირებადი პოლიტიკური გაერთიანების მაქსიმალური დისკრედიტაცია იყო იმ საზოგადოების თვალში, რომლებიც ოპოზიციურად განწყობილ მედიებს ადევნებდნენ თვალს. რეჟიმის პატრონებმა დაინახეს საფრთხე, რომ ოპოზიციურად განწყობილ საზოგადოებაში მათი კონტროლს მიღმა მყოფი პოლიტიკური გაერთიანების სატელევიზიო გაშუქებას შესაძლოა საპროტესტო ტალღა გაეღვივებინა, რაც არათუ ჩაახშეს, არამედ ფსევდოკრიტიკული მედიის ხელით მათი დისკრედიტაციაც მოახდინეს.
ჩვენმა საზოგადოებამ ძალიან კარგად იცის, რომ როგორც სააკაშვილი არასოდეს ყოფილა ჩვენი ქვეყნის ინტერესების დამცველი, ასევე არ ყოფილან უსუფაშვილი/ხიდაშელი/თარგამაძე და იმდროინდელი ოპოზიციის დიდი ნაწილი ხელისუფლების რეალური ოპონენტები და არც ეგრეთწოდებული კრიტიკული მედია ყოფილა ჭეშმარიტად კრიტიკული. მათი დიდი ნაწილი, კრიმინალური რეჟიმის ფასადურ დემოკრატიას აფარებული ლეღვის ფოთოლი იყო. საზოგადოება ხედავს, რომ იმ პერიოდში რეჟიმთან დაპირისპირებული პარტიებიდან თუ ცალკეული პოლიტიკოსებიდან მხოლოდ რამდენიმეა, ვინც დღესაც მათ წინააღმდეგ და შესაბამისად საქართველოს ინტერესების მხარეს დგას, ვინც არ აღმოჩნდა სხვადასხვა დროს შექმნილ “ფანჩატურში.” ის ნაწილი კი, რომელიც იმთავითვე “ფსევდოოპოზიციად” შეიქმნა, დღეს კვლავ ნაცმოძრაობის გვერდით დგას, რაც ადასტურებს, რომ მათ ერთი პატრონი ჰყავდათ და ჰყავთ, რომელიც გასცემს დავალებებს და აღნიშნულ ჯგუფებს, ჩვენს ქვეყანაში, საკუთარი ინტერესების გასატარებლად იყენებს. თუმცა, მათდა საუბედუროდ, ქართველმა ხალხმა ეს „პოლიტიკური განტოლება“ წარმატებით ამოხსნა და ჩვენი საზოგადოების მოტყუება აგენტურას აღარ გამოუვა”, – ვკითხულობთ განცხადებაში.