აშშ-ის ჯანმრთელობის დაცვის მინისტრი რობერტ ფრენსის კენედი უმცროსი საკვების და წამლის მარეგულირებელ სააგენტოს ეწვია, სადაც ის 40 წუთის განმავლობაში ამტკიცებდა, რომ „დიფ სთეითი“ არსებობს, FDA-ს თანამშრომლებს კი ინდუსტრიის მარიონეტები უწოდა. ინფორმაციას Politico ავრცელებს.
„პრეზიდენტი ტრამპი ყოველთვის საუბრობდა „დიფ სთეითზე“, მედია კი დაუფასებლად ექცევა მას და ამბობს, რომ ის პარანოიკია. მაგრამ „დიფ სთეითი“ რეალურია და ეს არ არის უბრალოდ ჯორჯ სოროსი, ბილ გეიტსი და ამაზრზენი ადამიანების ხროვა, რომლებიც ერთად სხედან ოთახში და ადამიანების განადგურებაზე ფიქრობენ“, – განაცხადა კენედიმ.
კენედიმ მოუწოდა FDA-ს თანამშრომლებს გამოიყენონ მისი ხელმძღვანელობის ოთხწლიანი პერიოდი, რამეთუ მან ფიცი დადო, რომ ჯანდაცვისა და სოციალური მომსახურების სამინისტრო ამ გავლენის ქვეშ არ მოექცევა და არც „დისიდენტების“ მოსაზრებებს გაითვალისწინებს.
„ჩვენ გვინდა ეს დავამთავროთ იმისთვის, რომ ჩვენი შვილები ჯანმრთელები იყვნენ“, – აღნიშნა კენედიმ.
ჯანდაცვისა და სოციალური მომსახურების სამინისტროს წარმომადგენელმა ენდრიუ ნიქსონმა აღნიშნა, რომ კენედი სიმართლეს ამბობდა, რომელიც ამერიკელებმა უკვე დიდი ხანია იციან – FDA მოქცეულია იმ სფეროების გავლენის ქვეშ, რომელსაც სააგენტო უნდა არეგულირებდეს. მისი თქმით, „სიჩუმის ეპოქა დასრულებულია“.
წინა კვირას კენედიმ 10 000-ზე მეტი თანამშრომლის სამსახურიდან გაშვება აუცილებელ ქმედებად დაასახელა და აღნიშნა, რომ სამინისტრო გამონახავს გზას, როგორ გააკეთოს მეტი საქმე ნაკლები დანახარჯებით.