პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა „დღის ქრონიკაში“ აშშ-ში შემდგარი შეხვედრები შეაჯამა და აღნიშნა, რომ ამერიკულ მხარესთან თანამშრომლობის პერსპექტივებსა და ხედვებზე იყო საუბარი.
„პირველ რიგში მადლობა მინდა გადავუხადო აშშ-ის საელჩოს და პირადად ელჩს საქართველოში თანამშრომლებისთვის და ასევე თანამშრომლობის გაღრმავების ნაწილში ხელშეწყობისთვის იმიტომ, რომ ჩვენი შეხვედრა შედგა ზუსტად ამერიკაში ვიზიტამდე და ჩვენ შევეხეთ ვიზიტის გეგმასაც. ვიზიტის პროგრამის ბევრი ნაწილი განხილული იყო საელჩოს წარმომადგენლებთან ერთად და როგორც საქართველოს საელჩო აშშ-ში, ისე აშშ-ის საელჩო საქართველოში ჩართული იყო ვიზიტის ფარგლებში შეხვედრების მომზადებაში. რა თქმა უნდა, ეს არის ბუნებრივი პროცესი, როგორიც უნდა იყოს ორ პარტნიორ ქვეყანას შორის.
რაც შეეხება მოლოდინებს, მე ვფიქრობ, რომ მოლოდინი ზუსტად ის არის, რომ ჩვენ იდენტიფიცირება გავუკეთოთ ისეთ მიმართულებას, რომელიც იქნება ურთიერთხელსაყრელი ორივე ქვეყნისთვის და ზუსტად ამ მიმართულებაზე უფრო მეტი ფოკუსი მოვახდინოთ. ალბათ ეს იგულისხმებოდა საელჩოს განცხადებაში. იყო თანამშრომლობის პერსპექტივებზე, ხედვებზე საუბარი. ჩვენ ჩვენი ხედვა გავაცანით და ჩვენ ამ შემთხვევაში ვართ პროაქტიური იმიტომ, რომ წარმოგვიდგენია, რომ აშშ-თან თანამშრომლობა გარკვეული მიმართულებებით განსაკუთრებით ხელსაყრელია და შეესაბამება ჩვენს ეროვნულ ინტერესებს. ვფიქრობ, რომ ეს მიმართულებები ასევე ძალიან საინტერესოა და შესაბამისობაშია ამერიკის ახალი ხელისუფლების ინტერესებთან“, – განაცხადა დავითაშვილმა.
საქართველოს პირველი ვიცე-პრემიერი, ლევან დავითაშვილი ამერიკის შეერთებულ შტატებში ვიზიტით იმყოფება.