ქართველი ემიგრანტი ქალი, 3 შვილის დედა თესალონიკში ბერძენმა ექიმმა მოკლა. ამის შესახებ ინფრორმაციას ბერძნულ მედიაზე დაყრდნობით ქართველი ემიგრანტი გია კვარაცხელია ავრცელებს.
კვარაცხელია სოციალურ ქსელში წერს, რომ თესალონიკის “იპოკრატიოს” 38 წლის ბერძენმა ანგიოქირურგმა 36 წლის ქართველი ემიგრანტი ქალი, მისი პაციენტი ჯერ მოკლა, შემდეგ კი მისი გვამი სოფელ პალიურიში მდინარეში გადააგდო.
“ყველაფერი დაიწყო 26 აპრილს, როდესაც ღამის საათებში, უბედური ქართველი ქალის და სამი შვილის დედის მეუღლემ, თესალონიკის თეთრი კოშკის პოლიციის განყოფილებაში ცოლის გაუჩინარების შესახებ განაცხადა. პოლიციელებს მან უამბო, რომ მისმა მეუღლემ ზემოთხსენებულ საავადმყოფოს მიმართა ქვედა კიდურებზე არსებული ვენების ვარიკოზის გამო მიკროქირურგიული ოპერაციის ჩატარების მიზნით და შემდეგ, უკან აღარ დაბრუნებულა. ასევე, ვერც მობილური ტელეფონის მეშვეობით დაკავშირებას ვერ ახერხებდა მასთან… პოლიციამ მაშინვე საავადმყოფოს მიაკითხა და მოიძია ექიმი, რომელიც აღნიშნულ ოპერაციაზე იყო პასუხისმგებელი. ანგიოქირურგმა დასაწყისში ყველაფერი უარყო, მაგრამ მას შემდეგ, რაც პოლიციელებმა მას მიუთითეს, რომ პაციენტს იცნობდა და მეტიც, ხშირად ესაუბრებოდა ხოლმე Facebook-ის მეშვეობით, განაცხადა, რომ კი, გაუკეთა აღნიშნულ პაციენტს ოპერაცია, მაგრამ შემდეგ სახლში წავიდა და მის შესახებ აღარაფერი სმენია. ვინაიდან, მისი ქცევა და მონაყოლი თავიდანვე წინააღმდეგობებს შეიცავდა, სამართლდამცავებმა საავადმყოფოს სათვალთავალო ვიდეოკამერების ჩანაწერი მოითხოვეს, საიდანაც აშკარად ჩანს, როგორ დებს გვამს ავტომანქანაში ანგიოქირურგი. შემდეგში, ის ხალკიდიკის მიმართულებით გაემართა, სადაც დაფიქსირებული იქნა სოფელ პალიურის მიდამოებში, მობილური სატელეფონო კავშირის ანტენის მონაცემების მეშვეობით. აღსანიშნავია, თვით ანგიოქირურგი, ფაქტების მოყვანამდე, უარყოფდა ხალკიდიკიში მოგზაურობას. პოლიციის მიერ გადამოწმებული იქნა ანგიოქირურგის სატელეფონო კავშირებიც და დადგინდა, რომ მას მკვლელობამდეც ჰქონდა მსხვერპლთან სატელეფონო კონტაქტი. ექიმი, ვინაიდან მის მიმართ ოფიციალური ბრალდება არ იყო წარდგენილი, ათენში, ნეო ირაკლიოში, მშობლების სახლში დაბრუნდა, თუმც პოლიციას მასზე თვალთვალი არ შეუწყვეტია. და ბოლოს, ხანგრძლივი ძიების შემდეგ, 36 წლის ქალის გვამი ნანახი იქნა 3 მაისს, აღნიშნული სოფლის მიდამოებში. ექიმი შეპყრობილი იქნა 4 მაისს, დილის საათებში, სათანადო ორდერის გაცემის შემდეგ და გადაყვანილი იქნა თესალონიკში, სადაც დღეს, 5 მაისს წარსდგება პროკურორის წინაშე”, – წერს ქართველი ემიგრანტი.
კვარაცხელიას ცნობით, დაუდგენელია რა გახდა ქართველი ემიგრანტი ქალის მკვლელობის მოტივი და მისი გარდაცვალების მიზეზი, რადგან დაკაბევული ექიმი ჯერჯერობით ახლნა-განმარტებას არ იძლევა, ხოლო სასამართლო-სამედიცინო ექსპერტს გვამის გახრწნის მაღალი ხარისხის გამო, დასკვნების გაკეთება გაუჭირდა.
“პირველი” ფაქტზე დამატებითი ინფორმაციის მოპოვებას შესაბამისი უწყებებისაგან ცდილობს.