მტრულ საქმიანობაში დახმარება და საბოტაჟი – ამ საქმის ფარგლებში დაყადაღებული ფონდების ხელმძღვანელთა სახლებში ჩატარებულ საგამოძიებო მოქმედებებთან დაკავშირებით კომენტარი გააკეთა შინაგან საქმეთა მინისტრის მოადგილემ. ალექსანდრე დარახველიძის განცხადებით, ჩხრეკა კანონის ფარგლებში, სასამართლო განჩინების საფუძველზე ჩატარდა და გადაცდომას ადგილი არ ჰქონია.
„რა მუხლებითაც გამოძიება არის დაწყებული, საკმაოდ მძიმე მუხლებია, შესაბამისად ჩატარდა საგამოძიებო მოქმედებები. პირად ცხოვრებაში ჩხრეკა ერთ-ერთი ყველაზე ინტენსიური ჩარევაა ადამიანის პირად ცხოვრებაში და სწორედ ამიტომ არის დადგენილი ჩვენი კონსტიტუციით და საპროცესო კოდექსით, რომ საჭიროა მოსამართლის განჩინება. არსებობდა სასამართლოს შესაბამისი გადაწყვეტილებები იმისთვის, რომ კონკრეტული პირების პირად საცხოვრებელ სივრცეში ჩატარებულიყო ჩხრეკა. ადვოკატები მონაწილეობდნენ, მათ ალბათ ექნება შესაბამისი საპროცესო გარანტიების ფარგლებში წვდომა მასალებზე და შესაბამისად შეუძლიათ რომ კონკრეტული ღონისძიებები გაასაჩივრონ. პოლიცია იყო იმ რაოდენობით მობილიზებული, რაც აუცილებელი იყო ამ ღონისძიების უსაფრთხოდ ჩასატარებლად. არავითარი რეპრესიები არ ხორციელდება, ხორციელდება ის, რაც გვაქვს ჩვენ კანონით ნაკისრი ვალდებულება“, – განაცხადა ალექსანდრე დარახველიძემ.