თურქეთის პრეზიდენტს, რეჯეფ თაიფ ერდოღანსა და ნატო-ს გენერალურ მდივანს, მარკ რუტეს შორის შეხვედრა გაიმართა. შეხვედრაზე ლიდერებმა თურქეთ-ნატოს ურთიერთობები, უკრაინა-რუსეთის ომთან დაკავშირებული მოვლენები, რეგიონული და გლობალური საკითხები განიხილეს.
პრეზიდენტის სასახლეში გამართული შეხვედრა მედიისთვის დახურული იყო. შეხვედრას ასევე ესწრებოდა თურქეთის საგარეო საქმეთა მინისტრი ჰაკან ფიდანი. შეხვედრის შემდეგ თურქეთის პრეზიდენტის ადმინისტრაციის საკომუნიკაციო დირექტორატმა განცხადება გაავრცელა.
განცხადების თანახმად, თურქეთი გააგრძელებს ყველაფრის გაკეთებას ნატო-ს გასაძლიერებლად, შიდა და გარე გამოწვევების მიუხედავად. ამასთან, ერდოღანის თქმით, თურქეთმა გააძლიერა ძალისხმევა უკრაინა-რუსეთის ომის ხანგრძლივი და სამართლიანი მშვიდობით დასასრულებლად.
„თურქეთის პრეზიდენტმა გამართა შეხვედრები რუსეთის პრეზიდენტთან, ვლადიმერ პუტინთან და უკრაინის პრეზიდენტთან, ვოლოდიმირ ზელენსკისთან. ერდოღანმა აღნიშნა, რომ თურქეთი მტკიცედ უჭერს მხარს ყოვლისმომცველი ცეცხლის შეწყვეტის დამყარებას და ინარჩუნებს პოზიციას, რომ ნატო არ უნდა იყოს ამ ომის მონაწილე, და რომ მშვიდობის შესაძლებლობა ხელიდან არ უნდა გაუშვან. თავის მხრივ, ნატო-ს გენერალურმა მდივანმა, მარკ რუტემ აღნიშნა, რომ თურქეთი ნატო-ს მტკიცე მოკავშირეა“, – ნათქვამია გავრცელებულ ინფორმაციაში.