ტელეარხი Al Arabiya წყაროზე დაყრდნობით იტყობინება, რომ ღაზის სექტორის სამხრეთით, გვირაბში „ჰამასის“ ლიდერის, მუჰამედ სინვარის ცხედარი აღმოაჩინეს, რომელიც რამდენიმე დღის წინ, ისრაელის ავიაიერიშის შედეგად დაიღუპა.
ხან-იუნისში, ევროპული საავადმყოფოს ქვეშ არსებულ გვირაბში ასევე სინვარის 10 თანაშემწის ცხედარი იპოვეს.
ისრაელელმა სამხედროებმა საავადმყოფოზე იერიში 13 მაისს მიიტანეს. „ცაჰალში“ განმარტავდნენ, რომ საავადმყოფოს ქვეშ „ჰამასის“ სარდლობის პუნქტი იყო განლაგებული. ისრაელში სინვარის გარდაცვალების ფაქტი ჯერ არ დაუდასტურებიათ.
მუჰამედ სინვარი „ჰამასის“ წინა ლიდერის იაჰია სინვარის უმცროსი ძმაა. იაჰია ღაზაში 2024 წლის ოქტომბერში მოკლეს. ის ორგანიზაციას აგვისტოდან ხელმძღვანელობდა, მას შემდეგ, რაც მისი წინამორბედი ისმაილ ჰანია თეირანში მოკლეს.
კომენტარები