ვლადიმირ პუტინთან სატელეფონო საუბრამდე გერმანიის, საფრანგეთისა და დიდი ბრიტანეთის ლიდერებმა დონალდ ტრამპთან უკრაინის საკითხი განიხილეს.
„აზრთა მიმოცვლა უშუალოდ ტრამპსა და პუტინს შორის სატელეფონო საუბრის შემდეგ გაგრძელდება“, – აღნიშნულია გერმანიის მთავრობის წარმომადგენლის, შტეფან კორნელიუსის განცხადებაში.
თავის მხრივ, დიდი ბრიტანეთის პრემიერის კირ სტარმერის პრეს-სამსახურში დააზუსტეს, რომ ევროპელი ლიდერებისა და აშშ-ის პრეზიდენტის საუბრის თემა იყო „სიტუაცია უკრაინაში და ომის კატასტროფული ფასი ორივე მხარისთვის“. ლიდერებმა განიხილეს ასევე სანქციების ამოქმედება, თუ რუსეთი არ გამოავლენს სამშვიდობო მოლაპარაკებების წარმოებასადმი სერიოზულ ძალისხმევას.
საფრანგეთის პრეზიდენტმა ემანუელ მაკრონმა კი სოციალურ ქსელში დაწერა: „ხვალ პრეზიდენტმა პუტინმა უნდა დაამტკიცოს, რომ მშვიდობა სურს და ცეცხლის 30-დღიან უპირობო შეწყვეტას დათანხმდეს, რომელიც პრეზიდენტმა ტრამპმა წარადგინა და რომელსაც მხარს უჭერენ უკრაინა და ევროპა“.
მანამდე ტრამპმა განაცხადა, რომ 19 მაისს ჯერ რუსეთის პრეზიდენტთან გამართავს სატელეფონო საუბარს, შემდეგ კი უკრაინის პრეზიდენტ ზელენსკისთან და ნატოს წევრი ქვეყნების ლიდერებთან.