რუსეთის პრეზიდენტი ვლადიმირ პუტინი მიიჩნევს, რომ მისი ჯარი შეძლებს უკრაინის შეიარაღებული ძალების წინააღმდეგობის გადალახვას და უკრაინის 4 რეგიონს მთლიანად დაიპყრობს – წერს Bloomberg-ი ანონიმურ წყაროზე დაყრდნობით.
წყარო აცხადებს, რომ აშშ-ის პრეზიდენტ დონალდ ტრამპთან სატელეფონო საუბარს პუტინი სწორედ ამ მოსაზრებაზე დაყრდნობით წაიყვანს, რადგან დარწმუნებულია, რომ რუსეთის არმია მთლიანად შეძლებს ლუგანსკის, დონეცკის, ხერსონისა და ზაპოროჟიეს გაკონტროლებას, რომელთა ანექსიის შესახებ რუსეთმა ომის დასაწყისში განაცხადა.
სტრატეგიული კვლევების საერთაშორისო უნივერსიტეტის მკვლევარი ბენ ბარი, რომელსაც გამოცემა გაესაუბრა, მოვლენათა ასეთ განვითარებას ნაკლებად სავარაუდოდ მიიჩნევს. მისი თქმით, ეს შესაძლებელი გახდება, თუ უკრაინის თავდაცვა ჩამოიშლება, თუმცა „ახლა ასეთი სცენარის განვითარება ნაკლებად სავარაუდოა“.
Bloomberg-ი ასევე აღნიშნავს, რომ ტრამპს ომის სწრაფი შეწყვეტა სურს, პუტინი კი იმის არანაირ ნიშანს არ აჩვენებს, რომ საბრძოლო მოქმედებების შეწყვეტისთვის მზად არის. ამასთან, გამოცემის წყარო აცხადებს, რომ რუსეთის პრეზიდენტი სანქციების სავარაუდო გამკაცრების საკითხთან მიმართებაშიც პოზიტიურად არის განწყობილი.