აშშ-მა ავსტრალიას ჩამოწერილი Abrams-ის ტიპის ტანკების უკრაინაში გაგზავნის ნებართვა მისცა. ავსტრალიური მედიაკომპანიის, „ეიბისის“ ცნობით, უახლოეს პერიოდში პირველი ტანკები საზღვაო გზით გაიგზავნება უკრაინაში.
როგორც ტელეკომპანია აღნიშნავს, აშშ დათანხმდა ამერიკული წარმოების Abrams-ის ტიპის ტანკების უკრაინაში გაგზავნას, მიუხედავად იმისა, რომ პირად საუბრებში ამერიკელი მაღალჩინოსნები ასეთი დახმარების ეფექტურობას ეჭვქვეშ აყენებდნენ. ამასთან, ისინი ამბობდნენ, რომ ასეთი ტექნიკის უკრაინაში მიწოდება რთული იქნებოდა და ასევე არ იქნებოდა იოლი ტანკების საბრძოლო მდგომარეობაში შენარჩუნებაც. მათივე თქმით, Abrams-ის ტიპის ტანკები იმ ბრძოლებში, სადაც აქტიურად გამოიყენება დრონები, შესაძლოა, გამოუსადეგარი იყოს, რადგან მათი სახურავი დარტყმებისგან დაუცველი აღმოჩნდა.
როგორც „ეიბისი“ აღნიშნავს, ოფიციალურად უკრაინისთვის ავსტრალიური Abrams-ების გადაცემის მიზანშეწონილობასთან დაკავშირებით კითხვები არ დასმულა.
„ჩვენ ძალიან მჭიდროდ ვთანამშრომლობდით უკრაინასთან, ძალიან მჭიდროდ ვთანამშრომლობდით შეერთებულ შტატებთან, რომ გვენახა ეს ტვირთი და გვენახა, რომ ტანკები უკვე გზაშია“, – განაცხადა ავსტრალიის თავდაცვის მინისტრმა, რიჩარდ მარლზმა.
როდის შეძლებს უკრაინა ავსტრალიური ტანკების მიღებას, ჯერ დაზუსტებით უცნობია. ცნობილია მხოლოდ ის, რომ უკრაინის შეიარაღებულ ძალებში მოხვედრამდე, ისინი აღმოჩნდებიან პოლონეთის ერთ-ერთ ბაზაზე.
ცნობისთვის, მარტის დასაწყისში „ნიუ იორკ თაიმსი“ წერდა, რომ უკრაინისთვის აშშ-ის მიერ გადაცემული Abrams-ის ტიპის ტანკების თითქმის ორი მესამედი რუსეთის ჯარის მიერ არის დაზიანებული ან ხელში ჩაგდებული.