საქართველოს ეროვნული ნაკრები ივნისში დაგეგმილ ამხანაგურ მატჩებს ფარერის კუნძულებისა და კაბო ვერდეს ნაკრებების წინააღმდეგ ლიდერების გარეშე, ექსპერიმენტული შემადგენლობით ჩაატარებს. მათი არყოფნის ფონზე მთავარი მწვრთნელი ვილი სანიოლი შანსს ახალწვეულებს მისცემს, — ინფორმაციას Geo Team-ი ავრცელებს.
წყაროს ცნობით, სანიოლი გრძელი სეზონის შემდეგ ამხანაგური მატჩებისთვის გუნდის ძირითად ბირთვს არ გამოიძახებს. გამოძახებულთა სიაში არ იქნებიან: გიორგი მამარდაშვილი, ოთარ კაკაბაძე, ოთარ კიტეიშვილი, გიორგი ქოჩორაშვილი, გიორგი ჩაკვეტაძე, ზურიკო დავითაშვილი, ხვიჩა კვარაცხელია და გიორგი მიქაუტაძე.
მთავარი მეკარის არყოფნის პირობებში ნაკრების კარს, სავარაუდოდ, ლუკა გუგეშაშვილი დაიცავს, როგორც ეს ვილი სანიოლმა მარტში დააანონსა. Geo Team-ის ინფორმაციით, ფრანგი სპეციალისტი ეროვნული ლიგის ფეხბურთელებს და იმ ლეგიონერებს გამოიძახებს, რომელთა თამაშის შეფასებაც აქამდე ვერ შეძლო.
საქართველოს ნაკრები პირველ ამხანაგურ მატჩს 5 ივნისს „დინამო არენაზე“ ფარერის კუნძულების წინააღმდეგ ჩაატარებს, ხოლო 8 ივნისს ქუთაისში, რამაზ შენგელიას სახელობის სტადიონზე კაბო ვერდეს დაუპირისპირდება. ორივე შეხვედრა 20:00 საათზე დაიწყება.