არა მგონია, რომ ევროპას ჰქონდეს იმის რესურსი, რომ ამერიკა ჩაანაცვლოს უკრაინისთვის ეკონომიკური თუ სამხედრო დახმარების კუთხით, – განაცხადა „დღის ქრონიკაში“ დიპლომატმა, ელჩმა, კოტე ჟღენტმა.
მისივე თქმით, ეს შეუძლებელია ევროპის ეკონომიკური მდგომარეობიდან გამომდინარე. მან ხაზი გაუსვა, რომ საქართველოს სჭირდება ევრო-ატლანტიკური სივრცე, რათა ჰქონდეს უსაფრთხოების ქოლგა.
დიპლომატი შეეხო ასევე საქართველოში უცხოელ დიპლომატთა პროფესიული ქცევის საკითხსაც.
„ელჩების ასეთი ქცევა, როდესაც ელჩი ხარ და დიპლომატი, მით უმეტეს გამოცდილი, რაღაცნაირად საერთო სურათიდანაა ამოვარდნილი – დიპლომატიური ეტიკეტიდანაც და დიპლომატიური წესებიდანაც კი ამოვარდნილია. ჩემი აზრით, ეს არის უფრო ძველის ინერცია, რომელიც წამოსულია იმ პერიოდიდან, როდესაც აშშ-ის ძველი ადმინისტრაცია და ევროკავშირის ბიუროკრატია პრაქტიკულად ერთად მოქმედებდნენ. ახალი ბიუროკრატია, თუმცა იდეებით ისევ ძველი, ერთნაირადვე ვერ აჰყვა ტრამპის ახალ მიდგომებს. იქიდანაც ჯერ-ჯერობით ასეთი განსაკუთრებული ნიშნები არ ჩანს, რადგან იმდენი გლობალური პრობლემა დგას ახლა ტრამპის ადმინისტრაციის წინაშე, რომ დრო სჭირდება სანამ მოვა ისეთ რეგიონამდე და ქვეყნამდე, როგორიც საქართველოა“, – განაცხადა ჟღენტმა.