როდესაც საუბარია ხელისუფლებაზე და ხალხზე, ხელისუფლების წყარო არის ხალხი, ეს ძალიან კარგად უნდა ესმოდეთ ჩვენს, განსაკუთრებით ევროპელ მეგობრებს და პარტნიორებს, – განაცხადა გადაცემა „დღის ქრონიკაში“ საპარლამენტო ფრაქცია „ქართული ოცნების“ თავმჯდომარის პირველმა მოადგილე ირაკლი კირცხალიამ.
„ძალიან ბევრი მილოცვა მივიღეთ მთავრობაში, პრეზიდენტთან და თითოეულ მათგანს, ღირსეულ ჩვენს მეგობარს, ღირსეულ ჩვენს პარტნიორს მინდა მადლობა გადავუხადო მოლოცვისთვის. ყველამ კარგად ვნახეთ ჩვენს სტრატეგიულ პარტნიორ ქვეყნებში თუ როგორი ღირსშესანიშნავი ადგილები აინთო ჩვენი ფერებით და გულწრფელად იზეიმეს ჩვენთან ერთად. გულწრფელად გაიზიარეს ჩვენი ზეიმი“, – აღნიშნა მან.
ირაკლი კირცხალიას თქმით, გარკვეულ წერილებში ნახსენები იყო ხალხი და სურს მათ შეახსენოს რას ნიშნავს დემოკრატია.
„შეიძლება ისეთი მძაფრები არ არიან ამ შიდა ჩარევებში და ისეთი პირდაპირები, ისეთი თავხედები, როგორსაც ვხედავთ, მაგალითად გერმანიის საელჩოსგან და გერმანიის ელჩის მხრიდან, მაგრამ ვინც წერილებში არ მოიხსენია ხელისუფლება, მოიხსენია ხალხი, ხომ წარმოადგენენ დემოკრატიულ სახელმწიფოებს, ხომ არის მათი ძირითადი პრინციპი დაფუძნებული დემოკრატიაზე, რას ნიშნავს ხომ? ჩვენ ხომ არ უნდა შევახსენოთ დემოკრატიის საფუძვლები, მაგრამ თუ საჭირო გახდა, შევახსენოთ, პრობლემა არ არის იმიტომ, რომ გვაქვს ამის საშუალება და გვაქვს ამის უფლება, რომ შევახსენოთ. გადახედონ თითოეულ კვლევას თითოეული მიმართულებით, სადაც პირდაპირ მოწინავე და ხშირ შემთხვევაში, არა მხოლოდ რეგიონში, პირველ ადგილზეა ჩვენი ქვეყანა. ამიტომ, სრულიად თამამად შეგვიძლია შევახსენოთ, რომ დემოკრატიულად მოწყობილ ქვეყნებში ხელისუფლების წყარო არის ხალხი და საზოგადოება, ვისაც ისინი ულოცავდნენ. ამიტომ, ასეთ პოლიტიკურ, ღიმილისმომგვრელ მანიპულაციებს თუ თავს დაანებებენ და რეალურად, ობიექტურად შეაფასებენ მდგომარეობას, ექნებათ ობიექტური მიდგომები მეგობარ და პარტნიორ სახელმწიფოსთან, ყოველ შემთხვევაში ეგრეთ წოდებულთან და შავით თეთრზე დაწერილ სტრატეგიულ პარტნიორთან, ჩვენს ქვეყანასთან, იქნება უკეთესი.
კიდევ ერთხელ შევახსენებ, რომ როდესაც საუბარია ხელისუფლებაზე და ხალხზე, ხელისუფლების წყარო არის ხალხი. ეს ძალიან კარგად უნდა ესმოდეთ ჩვენს, განსაკუთრებით ევროპელ მეგობრებს და პარტნიორებს“, – აღნიშნა ირაკლი კირცხალიამ.