„ქართული ოცნების“ გორგასლის ოფისში საპარლამენტო უმრავლესობის სხდომა გაიმართა.
სხდომაზე უმრავლესობის წევრებმა რამდენიმე მნიშვნელოვანი საკითხი განიხილეს.
სხდომაზე მიღებული გადაწყვეტილებით, საპარლამენტო უმრავლესობა წარადგენს ახალ ინიციატივას, რომელიც შეეხება „საერთაშორისო დაცვის შესახებ“ საკანონმდებლო პაკეტს, რომელიც გულისხმობს შემდეგს:
-სისხლის სამართლის კოდექსს ემატება სასჯელის ახალი სახე – უცხოელის საქართველოდან გაძევება და განსაზღვრული ვადით საქართველოში შემოსვლის აკრძალვა;
-ადმინისტრაციულ სამართალდარღვევათა კოდექსში ჩაემატება ადმინისტრაციული სახდელის ახალი სახე – უცხოელის საქართველოდან გაძევება და უცხოელის საქართველოში შემოსვლის აკრძალვა;
-მნიშვნელოვნად იზრდება ჯარიმები იმ უცხოელებისთვის, რომლებმაც საქართველოს ტერიტორიაზე ყოფნის წესი დაარღვიეს და მარტივდება ქვეყანაში არალეგალურად მყოფ უცხოელთა გაძევების პროცედურა;
უმრავლესობის წევრებმა ასევე იმსჯელეს გენერალური პროკურორის გამარტივებული წესით არჩევის საკითხზე, რომლითაც კონსტიტუციით გაუთვალისწინებელი ადამიანების თუ ორგანიზაციების ჩართულობა გენერალური პროკურორის წარდგენის წესში აღარ იქნება სავალდებულო.
კიდევ ერთი მნიშვნელოვანი საკითხი, რაზეც უმრავლესობის სხდომაზე იყო მსჯელობა, ეხება საქართველოს მასშტაბით მიუსაფარი ცხოველების საკითხს.
საპარლამენტო უმრავლესობის გადაწყვეტილებით, იწყება სახელმწიფო პროგრამა, რომელიც გულისხმობს მიუსაფარი ცხოველების შესაბამის ბაზებში შეყვანას და იმ პროცედურების დაცვას და აღსრულებას, რაც მიუსაფარი ძაღლების გამრავლების პრევენციას მოახდენს.
ასევე, ამუშავდება ელექტრონული პროგრამა და მიღებულ იქნება მარეგულირებელი კანონი, რომლის მიხედვითაც გაადვილდება ძაღლის მეპატრონის მიკვლევადობა.
უმრავლესობის სხდომაზე, ასევე, საუბარი შეეხო „მაუწყებლობის შესახებ“ კანონში ცვლილებებს, რომლის მიხედვითაც მარეგულირებელ კომისიას ექნება ბანკებიდან ინფორმაციის გამოთხოვის შესაძლებლობა სასამართლო წესით.
ასევე, იქნება „გრანტების შესახებ“ კანონში მცირე ცვლილება, რომლის მიხედვითაც განათლებისა და კულტურის სფეროში კონკრეტულ საკითხებთან დაკავშირებით საგრანტო დაფინანსებას არ დასჭირდება მთავრობის თანხმობა.
