მე მგონია, რომ ამერიკის ინტერესები საქართველოსთან და რეგიონთან მიმართებაში ჩვენი რეგიონის გეოგრაფიული მდებარეობის მნიშვნელობით არის განპირობებული, – განაცხადა დიპლომატმა კოტე ჟღენტმა „დღის ქრონიკაში“.
მან აღნიშნა, რომ რუსეთ-უკრაინის ომის შემდეგ ე.წ. პოსტსაბჭოური ქვეყნების მნიშვნელობა უფრო გაიზარდა.
„ეს არის ამერიკელებისთვის დაინტერესების ერთი არეალი და მეორე,რომელზეც სულ ლაპარაკობენ – საქართველოს, როგორც დამაკავშირებელი რეგიონისა და ქვეყნის როლი აღმოსავლეთსა და დასავლეთს შორის სავაჭრო-ეკონომიკური ურთიერთობების გატარების დერეფნის მხრივ. თუმცა, მაინცდამაინც ყველას არ მოსწონს, რომ დერეფანი ვართ, მაგრამ, რას იზამ, ეს ფუნქცია გვაქვს. ჩვენ ვიყავით მსოფლიოს წამყვანი დაპირისპირებული ძალების წინააღმდეგობების გამოვლენის რეგიონი და ჩვენ მუდმივად გვინდა, რომ ჩვენი რეგიონი სხვადასხვა ძალის ცენტრების თანამშრომლობისა და განვითარების რეგიონად იქცეს. ამერიკელებიც უეჭველად დაინტერესებულები არიან ჩვენთან ურთიერთობების დალაგებაში და ურთიერთსასარგებლო ურთიერთობებში, როგორც ჩვენ“, – განაცხადა ჟღენტმა.