გარემოს დაცვისა და სოფლის მეურნეობის მინისტრი დავით სონღულაშვილი იმერეთის რეგიონში იმყოფებოდა.
„ყოველთვის ხაზგასმით აღვნიშნავ, რომ ჩვენთვის უპირველესი პრიორიტეტია აგროწარმოებაში ჩართულ ადამიანებთან, მათ შორის, სახელმწიფო პროგრამების ბენეფიციარებთან პირდაპირი კომუნიკაცია. დღეს იმერეთის რეგიონში ვიმყოფებოდით, სადაც ერთ-ერთ უმსხვილეს მოცვის მწარმოებელ კომპანია „აგროლეინში“ ფერმერებს და მეწარმეებს შევხვდით. საქართველოში მოცვის კულტურის გაშენების წარმატების ისტორია არის მაგალითი, თუ როგორ შეიძლება დასახო ამბიციური გეგმა და სულ რამდენიმე წელში მსოფლიო ბაზარზე ექსპორტიორი ქვეყნების ოცეულში მოხვდე. წლების წინ საქართველოში მოცვის ამ მასშტაბებით გაშენების იდეა წარმოუდგენლად ჩანდა. სახელმწიფოს აქტიური ხელშეწყობით, რაც გულისხმობს ფინანსებზე, ცოდნაზე, ტექნოლოგიებზე, ბაზრებზე წვდომაში მხარდაჭერას, დღეს მოცვის ბაღები საქართველოში 2,700 ჰექტარზე მეტ ფართობზეა გაშენებული.
მწარმოებლებთან შეხვედრაზე მოვისმინეთ საჭიროებების, გამოწვევების შესახებ ინფორმაცია. ჩვენი მხრიდან დავადასტურეთ, რომ სახელმწიფოს მხარდაჭერა გრძელდება“, – განაცხადა დავით სონღულაშვილმა.
მინისტრი სურსათის უვნებლობის, გარემოსდაცვითი ზედამხედველობის, სატყეო, ლაბორატორიული, დაცული ტერიტორიების მიმართულებებით სამინისტროს დაქვემდებარებული უწყებების რეგიონულ სამსახურებში თანამშრომლებს შეხვდა და მიმდინარე საკითხების შესახებ ინფორმაცია მოისმინა.
„მხოლოდ ჩვენი უწყებების, მათ შორის რეგიონული სამსახურების შესაძლებლობების გაძლიერებით – პროფესიონალი კადრებით, შესაბამისი ინფრასტრუქტურით და აღჭურვით არის შესაძლებელი ჩვენი სოფლის მეურნეობის და გარემოს დაცვის პოლიტიკის აღსრულება“, – აღნიშნა დავით სონღულაშვილმა.