რუსი სამხედრო სადაც ფეხს დგამს, მას მოაქვს მხოლოდ სიკვდილი, განადგურება და ნგრევა. პუტინს არ ადარდებს რუსი სამხედროები და უკრაინული დრონებით მოწყვეტილი მათი ფეხები, – ამის შესახებ უკრაინის საგარეო საქმეთა მინისტრი ანდრეი სიბიგა სოციალურ ქსელში წერს.
უკრაინის საგარეო უწყების ხელმძღვანელი ეხმაურება რუსეთის პრეზიდენტ ვლადიმერ პუტინის მიერ სანკტ-პეტერბურგის ეკონომიკურ ფორუმზე დღეს გაკეთებულ განცხადებას: „რუსი და უკრაინელი ხალხები რეალურად ერთი ერია, ამ თვალსაზრისით, მთელი უკრაინა ჩვენია, იქ, სადაც რუსი სამხედროს ფეხი აბიჯებს, ჩვენია“.
როგორც სიბიგამ აღნიშნა, პუტინის ცინიკური განცხადებები აშშ-ის სამშვიდობო ძალისხმევის სრულ უგულებელყოფას აჩვენებს.
„მაშინ, როდესაც აშშ და დანარჩენი მსოფლიო მოუწოდებენ მკვლელობების დაუყოვნებლივ შეწყვეტას, რუსეთის ომის მთავარი დამნაშავე განიხილავს მეტი უკრაინული ტერიტორიის მიტაცებისა და მეტი უკრაინელის მოკვლის გეგმას. პუტინის ყველა დღევანდელი გიჟური განცხადებებიდან გამორჩეულია რუსი სამხედროს ფეხის შესახებ. სინამდვილეში, სადაც რუსი სამხედრო ფეხს დგამს, მას მოაქვს მხოლოდ სიკვდილი, განადგურება და ნგრევა. პუტინს არ ადარდებს რუსი სამხედროები და უკრაინული დრონებით მოწყვეტილი მათი ფეხები. ის საკუთარი ხალხის მასობრივი მკვლელია. მან უკვე გაანადგურა ერთი მილიონი რუსი სამხედრო უაზრო სისხლისღვრაში უკრაინაში ყოველგვარი სტრატეგიული მიზნის მიღწევის გარეშე. ერთი მილიონი სამხედრო. ორი მილიონი ფეხი“, – წერს ანდრეი სიბიგა სოციალურ ქსელ X-ში.
როგორც უკრაინის საგარეო საქმეთა მინისტრი აღნიშნავს, ვიდრე პუტინი დაკავებულია სხვა ქვეყნებში რუსი სამხედროების გაგზავნით, ის ქვეყნის შიგნით რუსებს ეკონომიკურად აჩოქებს.
„მისი ცინიკური განცხადებები მხოლოდ ერთ მიზანს ემსახურება: გადაიტანოს საზოგადოების ყურადღება თავისი მეოთხედი საუკუნის ხანგრძლივობის მმართველობის სრული წარუმატებლობისგან. მან რუსეთი მიიყვანა ჩრდილოეთ კორეისა და ირანის მსგავსი გარიყული რეჟიმების სამარცხვინო კლუბში, საერთაშორისო იზოლაციაში და დაუსრულებელ ეკონომიკურ სტაგნაციაში, რომელიც მხოლოდ გაუარესდება. ერთადერთი გზა, აიძულო რუსეთს მშვიდობა, არის მისთვის დაუსჯელობის გრძნობის ჩამორთმევა. გაზარდეთ უკრაინის თავდაცვის მხარდაჭერა და დამანგრეველი სანქციებით მიაყენეთ რუსეთის ეკონომიკას მძიმე დარტყმა. გამოაცხადეთ რუსეთი ტერორისტულ სახელმწიფოდ. მოახდინეთ სრული იზოლაცია. მოიყვანეთ მოსკოვი გონს“, – წერს სიბიგა.
