არიან კონკრეტული – გლობალური ჩრდილოვანი ძალები, რომლებიც არიან დაინტერესებულები იმით, რომ მათ შორის საქართველოში მოხდეს პროცესების რადიკალიზაცია, – განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა გადაცემაში „დღის ქრონიკა“.
მან ისაუბრა „დიფ სთეითის“ ინტერესზე, შეიცვალოს საქართველოში ხელისუფლება და მოხდეს უკრაინაში მიმდინარე პროქსი ომში საქართველოს ჩართვა. თუმცა, მან ასევე აღნიშნა, რომ საქართველო ევროკავშირის მასშტაბით მარტო არ არის და ჰყავს ერთგული მეგობრები.
„არიან კონკრეტული – გლობალური ჩრდილოვანი ძალები, რომლებიც არიან დაინტერესებულები იმით, რომ მათ შორის საქართველოში მოხდეს პროცესების რადიკალიზაცია, თუნდაც, რევოლუციის გზით გაუშვან მათ ის ხელისუფლება, რომელიც არ არის მათი დავალებების შემსრულებელი. რატომ? – იმიტომ, რომ ისევ და იმ პროქსი ომში, რომელიც ახლა არის გაჩაღებული უკრაინის ტერიტორიაზე, საქართველო როგორღაც აღმოჩნდეს ჩათრეული, რაც ამავე ჩრდილოვანი ძალების, იგივე „დიფ სთეითის“ მიზნებთან იქნება თანხვედრაში.
საბედნიეროდ, ჩვენ არ ვართ მარტონი ევროკავშირის მასშტაბით, ჩვენ გვყავს ძალიან ერთგული, სანდო მეგობრები, თუნდაც, მხოლოდ უნგრეთის გახსენება რად ღირს ამ თვალსაზრისით. რასაკვირველია, ჩვენ ოპტიმიზმის საფუძველიც გვაქვს იმასთან მიმართებით, რომ საბოლოო ჯამში სიმართლე აუცილებლად თავის გზას იპოვის და ის მთელი მორევი ამ დეზინფორმაციის, ამ დამახინჯებული აღქმების გავრცელების, ტირაჟირების და სხვა თანმდევი პროცესებისა, ადრე თუ გვიან მიეცემა დავიწყებას.
თუმცა, რა თქმა უნდა, იმავდროულად ჩვენ ვაკეთებთ ყველაფერს, რათა მოხდეს საქართველოში სახელმწიფო სუვერენიტეტის კიდევ უფრო მეტად გაძლიერება, გამტკიცება. ეს არის ჩვენთვის მუდმივი საზრუნავი, ყოველდღიური დღის წესრიგი და ამ მიზნით ჩვენ ვდგამთ კონკრეტულ ნაბიჯებს, რომლებიც არის გამოხატული როგორც შესაბამის სამართლებრივ რეფორმებში, ისე მთელ რიგ პრაქტიკულ ნაბიჯებში”, – განაცხადა თორნიკე ჭეიშვილმა.