ჯანდაცვის სამინისტრომ, გაფანტული სკლეროზით დაავადებული პაციენტებისთვის, მედიკამენტების, მომსახურებისა და მაღალტექნოლოგიური კვლევების დაფინანსება დაიწყო. პროგრამის ფარგლებში, სახელმწიფომ, წამყვანი ფარმაცევტული კომპანიების მიერ წარმოებული, უმაღლესი ხარისხის მამოდიფიცირებელი მედიკამენტები „ოკრევუსი“ (ხსნარი) და „გილენია“ (აბები) უკვე შეიძინა. მედიკამენტების დაფინანსების შესახებ, ჯანდაცვის მინისტრმა, მიხეილ სარჯველაძემ გადაცემაში „იმედი LIVE“ ისაუბრა.
„ეს არის ძალიან მაღალი დონის, ალბათ მსოფლიოში ერთ-ერთი საუკეთესო მედიკამენტი, რომელიც გაფანტული სკლეროზის სამკურნალოდ არის გამოგონილი და არის აპრობირებული“, – აღნიშნა მიხეილ სარჯველაძემ.
ბენეფიციართა ფინანსური მხარდაჭერისთვის, მკურნალობის მონიტორინგისა და მისი ეფექტურობის გაზრდის მიზნით, პაციენტებს, საჭიროების მიხედვით, უფასოდ ჩაუტარდებათ თავის ტვინისა და ზურგის ტვინის მაგნიტურ-რეზონანსული კვლევები.
პროგრამა, ასევე, მოიცავს, დღის სტაციონარის პირობებში, მედიკამენტ მეთილპრედნიზოლონით მკურნალობის კომპონენტს, რომელიც დაავადების გამწვავების შემთხვევაში დაინიშნება და სრულად დაფინანსდება.
ჯანდაცვის მინისტრის თქმით, სახელმწიფოს აქვს ბიუჯეტი და შესაძლებლობა, მოსახლეობის საკეთილდღეოდ, გაბედული ნაბიჯები გადადგას.
„ჩემთვის, როგორც ამ ქვეყნის მოქალაქისთვის ეს არის დიდი სასიხარულო ამბავი. აი ეს არის საზოგადოების გამარჯვება, ეს არის დიდი ნაბიჯი წინ. მიუხედავად იმისა, რომ ბიუჯეტი, ხარჯი ამასთან დაკავშირებით საკმაოდ დიდია, საბედნიეროდ დღეს ჩვენს სახელმწიფოს აქვს შესაძლებლობა, რომ ასეთი გაბედული ნაბიჯები გადადგას ჩვენი ქვეყნის მოსახლეობის საკეთილდღეოდ“. განაცხადა ჯანდაცვის მინისტრმა მიხეილ სარჯველაძემ.