საგარეო საქმეთა მინისტრის პირველმა მოადგილემ, გიორგი ზურაბაშვილმა და ანტიკორუფციული ბიუროს ხელმძღვანელმა, რაჟდენ კუპრაშვილმა საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებთან საინფორმაციო შეხვედრა გამართეს.
შეხვედრა FARA-სა და „გრანტების შესახებ“ კანონებს და მასთან დაკავშირებულ საკითხებს ეხებოდა.
საგარეო საქმეთა სამინისტროს პრესსამსახურის ინფორმაციით, შეხვედრის ფარგლებში დიპლომატიურ კორპუსს ანტიკორუფციული ბიუროს წარმომადგენლებმა გააცნეს აღნიშნულ კანონებთან დაკავშირებით ბიუროს საქმიანობა.
„დიპლომატიური კორპუსის წარმომადგენლებს კიდევ ერთხელ განემარტათ, რომ კანონები დემოკრატიულ პრინციპებს ეფუძნება და ხელს შეუწყობს გამჭვირვალე, ნდობაზე დაფუძნებულ თანამშრომლობას.
როგორც რაჟდენ კუპრაშვილმა აღნიშნა, არ არსებობს რაიმე სახის გარემოება, რომელიც საფრთხეს უქმნის საერთაშორისო ორგანიზაციების საქმიანობას ან კონკრეტული არასამთავრობო ორგანიზაციების საქმიანობას“, – აღნიშნულია საგარეო უწყების მიერ გავრცელებულ ინფორმაციაში.
მათივე ცნობით, ანტიკორუფციული ბიუროს ხელმძღვანელმა დეტალურად უპასუხა დიპლომატების შეკითხვებს.
როგორც საგარეო უწყებაში აცხადებენ, ქართულმა მხარემ კიდევ ერთხელ დაადასტურა, რომ ღიაა საერთაშორისო პარნტიორებთან თანამშრომლობისთვის და აღნიშნულ საკითხებთან დაკავშირებით სხვადასხვა ფორმატში დიალოგის გაგრძელების მზადყოფნა გამოთქვა.
„საგარეო საქმეთა სამინისტროში, ანტიკორუფციულ ბიუროსთან ერთად, ჩატარდა შეხვედრა დიპლომატიურ კორპუსსა და საერთაშორისო ორგანიზაციებთან. შეხვედრაზე მთავარი მომხსენებელი იყო ბატონი რაჟდენ კუპრაშვილი, ანტიკორუფციული ბიუროს ხელმძღვანელი. მან მიაწოდა დიპლომატიურ კორპუსს ყოვლისმომცველი ინფორმაცია, რას ითვალისწინებს ახლად შემოსული კანონი, რა რეგულაციებს ექვემდებარებიან ის ორგანიზაციები, რომლებიც საქმიანობენ საქართველოში. ძალიან საინტერესო იყო ეს შეხვედრა როგორც დიპლომატიური კორპუსისთვის, ისე საერთაშორისო ორგანიზაციებისთვის. დაისვა არაერთი შეკითხვა, გაეცა ძალიან საინტერესო პასუხები“, – განაცხადა საგარეო საქმეთა მინისტრის პირველმა მოადგილემ, გიორგი ზურაბაშვილმა შეხვედრის დასრულების შემდეგ.
რაჟდენ კუპრაშვილის თქმით, შეხვედრაზე დიპლომატებსა და საერთაშორისო ორგანიზაციების წარმომადგენლებს მიაწოდეს ინფორმაცია, როგორ მოხდა კანონის იმპლემენტაცია და როგორ მიმდინარეობს აღსრულება.
„ვისაუბრეთ „ფარასა“ და გრანტების კანონის აღსრულებასთან დაკავშირებულ საკითხებზე. მივაწოდეთ ინფორმაცია, თუ როგორ მოხდა კანონის იმპლემენტაცია და როგორ მიმდინარეობს აღსრულება. ასევე, ვისაუბრეთ იმ ფაქტთან დაკავშირებით, რომ არ არსებობს დღეს რამე სახის გარემოება, რომელიც საფრთხეს უქმნის საერთაშორისო ორგანიზაციების ან კონკრეტული არასამთავრობო ორგანიზაციების საქმიანობას. კიდევ ერთხელ იქნა აღნიშნული, რომ კიდევ უფრო მეტად ცხადი იქნება ყველა იმ ორგანიზაციის საქმიანობა, რომელიც უკავშირდება დონორი ორგანიზაციების მხრიდან დაფინანსებას. საინტერესო შეხვედრა იყო იმ კუთხით, რომ დღეს ყველა საელჩოს წარმომადგენელს ჰქონდა შესაძლებლობა, პირადად ჩემთვის დაესვა კითხვები აღნიშნულ კანონებთან დაკავშირებით და მიეღოთ ინფორმაცია. რა თქმა უნდა, ასეთი საინფორმაციო შეხვედრები მომავალშიც გაგრძელდება“, – განაცხადა რაჟდენ კუპრაშვილმა.