„არჩევნებს არაფერი ემუქრება, ელექტრონული არჩევნებია, დამკვირვებლებიც არ გვაკლია, თუნდაც შიდა დამკვირვებლები, ჟურნალისტები, ექსპერტები,“ – ამის შესახებ საქართველოს პარლამენტის თავმჯდომარის პირველმა მოადგილემ, გიორგი ვოლსკიმ საქართველოს შესახებ ეუთო/ოდირის განცხადებაზე საუბრისას განაცხადა.
„არცერთი სახელმწიფო და მით უმეტეს საქართველო არ დაუშვებს იმას, რომ რაიმე მოხდეს ისეთი, რომელიც კითხვებს გამოიწვევს. კითხვები გამოიწვია ეუთო/ოდირის დასკვნამ. არა თუ კითხვები გამოიწვია, ასეთი გააფთრებული შეტევა პრაქტიკაში არ არსებობდა არასდროს ევროპულ სივრცეში. შეუტიეს იმიტომ რომ დადებითი დასკვნა დაწერა“, – განაცხადა ვოლსკიმ.
ცნობისთვის, ეუთო/ოდირი საქართველოს შესახებ განცხადებას ავრცელებს. დოკუმენტში ნათქვამია, რომ საქართველოს ხელისუფლება არ აპირებს ოფისის მოწვევას ადგილობრივი არჩევნების დასაკვირვებლად, ეს კი წარმოადგენს გამონაკლისს საქართველოს ბოლო ოცი წლის განმავლობაში არსებული პრაქტიკისგან.