არასამთავრობოების გაუმჭვირვალობა და უცხოური წყაროებიდან გავრცელებული ინფორმაცია „ხალხის ძალის“ აღმასრულებელი მდივანის, გურამ მაჭარაშვილისთვის იმის დასტურია, რომ საქართველოში საჭირო იყო უცხოეთის აგენტების აქტის მიღება.
„ეს არის მათი გამჭვირვალობა?! სადღაც, წყაროზე, ვიღაცა რომ იტყვის, „საიას“ ჩაერიცხა ერთი მილიონი, ამის იმედად უნდა იყოს საქართველოს მოქალაქე და ამას ჰქვია გამჭვირვალობა?! ამიტომ მივიღეთ „ფარას“ კანონი და გრანტების შესახებ კანონში ცვლილებები, რომ საქართველოს მოქალაქემ იცოდეს რა თანხები ირიცხება, რისთვის ირიცხება და ვის ერიცხება“, – აღნიშნა გურამ მაჭარაშვილმა.
ევროპარლამენტის პოლიტიკური ჯგუფის მიერ გასაჯაროებული ინფორმაციით დადასტურდა, რომ კონკრეტული არასამთავრობო ორგანიზაციები ევროკომისიისგან სოლიდურ თანხებს იღებდნენ. ვებ-გვერდზე მითითებულია კონკრეტული თანხაც, რომელიც ორგანიზაციებს უკვე ჩაერიცხათ ან მომავალში ჩაერიცხებათ.
ამ ინფორმაციის თანახმად, ახალგაზრდა იურისტთა ასოციაციას მიღებული აქვს 967 ათას ევროზე მეტი. ამავე ოდენობის თანხაზე აქვს ევროკომისიას კონტრაქტი დადებული „სოციალური სამართლიანობის ცენტრთან“. ბაია პატარაიას „საფარი“ კი, კონტრაქტის მიხედვით, 900 ათას ევროს მიიღებს. ორი მილიონის ღირებულების კონტრაქტია გაფორმებული „სოროსის ფონდთან“.