გერმანიის მთავრობა უარყოფს აშშ-ის პრეზიდენტის, დონალდ ტრამპის განცხადებას იმის შესახებ, რომ Patriot-ის ტიპის პირველი ჰაერსაწინააღმდეგო სისტემები უკვე გერმანიაშია და უკრაინისკენ მიემართება. ინფორმაციას გერმანული მედია ქვეყნის თავდაცვის სამინისტროს წარმომადგენელზე დაყრდნობით ავრცელებს.
როგორც გერმანიის თავდაცვის სამინისტროს წარმომადგენელმა განაცხადა, ქვეყნის მთავრობა ასეთი გადაწყვეტილების შესახებ საქმის კურსში არავის ჩაუყენებია.
„მე ვერ დაგიდასტურებთ, რომ მოცემულ დროს რაღაც გზაში იმყოფება. მე ამის შესახებ არაფერი ვიცი“, – თქვა გერმანიის თავდაცვის სამინისტროს წარმომადგენელმა.
მან აღნიშნა, რომ ორშაბათს უკრაინის მხარდამჭერი „რამშტაინის“ ფორმატის მორიგი შეხვედრა გაიმართება. შეხვედრის მონაწილეები იმსჯელებენ იმაზე, თუ როგორ მიაწოდონ უკრაინას Patriot-ის ტიპის კომპლექსები.
ცნობისთვის, გუშინ ტრამპმა განაცხადა, რომ Patriot-ის ტიპის ჰაერსაწინააღმდეგო სისტემისთვის განკუთვნილი რაკეტები უკრაინაში უკვე გაიგზავნა.