უნგრეთმა სანქციები დაუწესა უკრაინის სახმელეთო ჯარების სამ მაღალჩინოსანს, ორმაგი მოქალაქეობის მქონე ეთნიკურად უნგრელი მობილიზებული პირის გარდაცვალების გამო.
უნგრეთის საგარეო საქმეთა მინისტრის, პიტერ სიიარტოს განცხადებით, სანქციები დაუწესდათ უკრაინის შეიარაღებული ძალების სახმელეთო ჯარების სარდლობის შტაბის პერსონალის სამმართველოს უფროსს, ოპერატიული სარდლობის „დასავლეთის“ მეთაურს და თავდაცვის სამინისტროს მობილიზაციის დეპარტამენტის ხელმძღვანელს.
სამივე მათგანს უნგრეთის ტერიტორიაზე შესვლა ეკრძალებათ.
სიიარტო უკრაინას „დიდი პრობლემებით“ დაემუქრა, თუ უნგრეთ-უკრაინის ურთიერთობები კიდევ უფრო გაუარესდება.
ამ კონტექსტში მან აღნიშნა, რომ სწორედ უნგრეთი წარმოადგენს უკრაინისთვის ევროპული ელექტროენერგიისა და გაზის მიწოდების მთავარ არხს.
„ამიტომ უკრაინას მართლაც დიდი პრობლემები შეექმნება მხოლოდ ამ ურთიერთობების გაყინვის შემთხვევაში“, – განაცხადა მან.