დაზვერვის სამსახურის ყოფილი უფროსი აცხადებს, რომ ჩორჩანის საგუშაგოს გახსნაზე ინფორმაცია არ ჰქონდა და ფაქტის შესახებ მედიით შეიტყო. დავით სუჯაშვილმა პროკურატურას ჩვენება მისცა – მან გამოკითხვის დასრულების შემდეგ განაცხადა, რომ საგუშაგოს ჩადგმით მოსახლეობა რთულ ვითარებაში აღმოჩნდა. საბოტაჟის და მტრულ საქმიანობაში დახმარების მუხლებით მიმდინარეობს გამოძიება – ამ საქმის ეპიზოდია ჩორჩანის საგუშაგოს ჩადგმა. შესწავლის ერთ-ერთ საგანს, ოფიციალური განმარტებით, საოკუპაციო ხაზთან შინაგან საქმეთა იმჟამინდელი მინისტრის, გიორგი გახარიას ქმედებები წარმოადგენს
“სამწუხაროდ, ღია წყაროებიდან გავიგე ეს ინფორმაცია. კარგი იქნებოდა, რომ მანამდე მცოდნოდა. ჩატარდა რეფორმა, შეიქმნა ეროვნული უსაფრთხოების საბჭო. კანონი არეგულირებს ამ საბჭოს საქმიანობას. დაზვერვის სამსახურის ხელმძღვანელი არის მუდმივი წევრი ამ საბჭოში, აქედან გამომდინარე დამიძახეს მე. საბჭომ უნდა განიხილოს მსგავსი საკითხები. ეს არა მარტო უსაფრთხოების კუთხით არის ძალიან მნიშვნელოვანი, თითოეული ჩვენგანისთვის არის სენსიტიური საქმე. ჩემთვის პირადად, ის ტერიტორია დაკარგულია, ყველა გოჯი არის ჩემთვის დაკარგული.
რაც მე მაქვს ინფორმაცია, მოსახლეობა ჩავარდა საკმაოდ რთულ ვითარებაში. იქ დამატებით საგუშაგოები გახსნა რუსეთის ფედერაციამ და სამეთვალყურეო საშუალებები დაამონტაჟა. ეს არის ჩემთვის ძალიან დიდი პრობლემა”, -აცხადებს დაზვერვის სამსახურის ყოფილი უფროსი დავით სუჯაშვილი.