ამერიკელი კონგრესმენი, ჯო უილსონი, რომელიც „მეგობარი აქტის“ ავტორია, სოციალურ ქსელ X-ში სულ უფრო მეტ პოსტს უძღვნის საქართველოს, ვიდრე საკუთარ შტატს, სამხრეთ კაროლინას, წერს გამოცემა The American Conservative-ის ანალიტიკოსი ენტონი კონსტანტინი.
როგორც The American Conservative აღნიშნავს, „მეგობარი აქტი“ კონგრესმენ ჯო უილსონის მიერ იყო წარდგენილი, რომელიც თითქოსდა სამხრეთ კაროლინას წარმოადგენს. ავტორის განმარტებით, თითქოსდა იმიტომ ითქმის, რომ გაურკვეველი მიზეზებით ის საქართველოს გადაეკიდა. მარტიდან ის სოციალურ ქსელ X-ზე სულ უფრო მეტ პოსტს უძღვნის საქართველოს, ვიდრე საკუთარ შტატს, სამხრეთ კაროლინას. ის ხშირად ხვდება ქართული ოპოზიციის ლიდერებს. მან საქართველოს ეროვნული დროშის დღეც კი აღნიშნა.
უილსონი ფიქრობს, რომ საქართველოს მთავრობამ არაერთხელ გააყალბა არჩევნები, ბოლოს ეს 2024 წელს მოხდა. როგორც „მეგობარი აქტშია“ აღნიშნული, ამ „გაყალბებამ“ ზიანი მიაყენა „საქართველოში დემოკრატიის კონსოლიდირებას“, რაც „კრიტიკულად მნიშვნელოვანია… აშშ-ის ეროვნული ინტერესებისთვის“. მაგრამ, როგორც სტატიაში წერია, არსად ამბობენ, თუ რატომ არის კონსოლიდაცია ასეთი მნიშვნელოვანი: მას უბრალოდ, როგორც მოცემულობას იღებენ.