ისრაელს სურს ღაზის გათავისუფლება და არა მისი ოკუპაცია, ჩვენი გეგმა ომის დასრულების საუკეთესო გზაა, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ იერუსალიმში გამართულ პრესკონფერენციაზე განაცხადა.
ნეთანიაჰუს თქმით, პრესკონფერენციას სიმართლის გასაჟღერებლად მართავს.
„სიმართლე კი ის არის, რომ „ჰამასს“ ღაზაში კვლავ ჰყავს ათასობით შეიარაღებული ტერორისტი და პირობას დებს, რომ გაიმეორებს 7 ოქტომბრის სისასტიკეს და გაანადგურებს ისრაელს. ბევრი ღაზაში მცხოვრები გვევედრება, ისინი მსოფლიოს ევედრებიან: გაგვათავისუფლეთ, გაგვათავისუფლეთ და გაათავისუფლეთ ღაზა „ჰამასისგან“. ჩვენი მიზანი არ არის ღაზის ოკუპაცია. ჩვენი მიზანია ღაზის გათავისუფლება, „ჰამასის“ ტერორისტებისგან გათავისუფლება. ომი, შეიძლება, ხვალ დასრულდეს, თუ „ჰამასი“ იარაღს დაყრის და ყველა დარჩენილ მძევალს გაათავისუფლებს“, – აცხადებს ნეთანიაჰუ.
მისივე თქმით, ისრაელს ომის დასრულება ძალიან სწრაფად სურს.
„არ მინდა ზუსტ ვადებზე საუბარი, მაგრამ ჩვენ საკმაოდ მოკლე გრაფიკზე ვსაუბრობთ, რადგან გვსურს ომის დასრულება. ჩვენ ასე ვასრულებთ ომს“, – განაცხადა ნეთანიაჰუმ.
ნეთანიაჰუმ დაასახელა ღაზაში ომის დასრულების ხუთი წინაპირობა: „ჰამასის“ განიარაღება, ყველა მძევლის გათავისუფლება, ღაზის სექტორის დემილიტარიზაცია, ისრაელის საერთო კონტროლი უსაფრთხოებაზე, არაისრაელური სამოქალაქო ადმინისტრაციის შექმნა, რომლის მიზანი ისრაელთან მშვიდობის მიღწევა იქნება. მისივე თქმით, ვაშინგტონთან კოორდინაციით, ისრაელი მუშაობს ღაზაში ჰუმანიტარული დახმარების გაზრდაზე.