საქართველოს კალათბურთის ფედერაციამ ეროვნული ნაკრების კაპიტნის, თორნიკე შენგელიას შეკრებიდან წასვლის მიზეზი გაამხილა. ფედერაციის მიერ გავრცელებულ ინფორმაციაში აღნიშნულია, რომ ესტონეთთან მატჩის დროს გამოვლენილი გულის არითმიის გამო, შენგელიას ესპანეთში გამოკვლევების ჩასატარებლად მოუწია გამგზავრება.
„ყველა საჭირო კვლევის ჩატარებისა და 10-დღიანი ექიმების მეთვალყურეობის ქვეშ მკურნალობის შემდეგ, საბედნიეროდ, ყველაფერი წარმატებით დასრულდა.
სამედიცინო პროტოკოლის მიხედვით, ხვალიდან ჩვენი კაპიტანი ეტაპობრივად დაიწყებს პროგრესულ ვარჯიშს და ოფიციალურად კვლავ შეუერთდება გუნდს ლიმასოლში“, – აღნიშნავენ ფედერაციაში.
დღეს კი ეროვნული ნაკრები ჩეხეთთან დახურულ ამხანაგურ შეხვედრას ჩაატარებს, 21 აგვისტოს კი ამავე ნაკრებს უკვე ღია მატჩში დაუპირისპირდება.
ევროპის ჩემპიონატი 27 აგვისტოს დაიწყება. ჩვენი ნაკრები კი პირველ შეხვედრას ტურნირზე 28 აგვისტოს, თბილისის დროით 16:00 საათზე, ესპანეთის ნაკრების წინააღმდეგ ჩაატარებს.