ვენესუელის პრეზიდენტმა, ნიკოლას მადურომ განაცხადა, რომ მისი ქვეყანა ალყაში იმყოფება.
ეს განცხადება მადურომ მას შემდეგ გააკეთა, რაც აშშ-მა მნიშვნელოვნად გააძლიერა სამხედრო წარმომადგენლობა კარიბის ზღვის სამხრეთ ნაწილში. მიმდინარე კვირაში რეგიონში გააგზავნეს აშშ-ის საზღვაო ძალების დამატებითი ხომალდები.
კარაკასში სამხედროების წინაშე სიტყვით გამოსვლისას ვენესუელის პრეზიდენტმა განაცხადა, რომ ვენესუელის სანაპიროებთან რამდენიმე ამერიკული სამხედრო ხომალდის, ატომური წყალქვეშა ნავისა და 4,500 სამხედრო მოსამსახურის განლაგება არის „მტრული ალყა, რომელიც არღვევს გაერო-ს წესდებას“.
„მაგრამ ისინი ვერანაირ პირობებში ვერ შეძლებენ ვენესუელაში შეჭრას. ის, რითიც ისინი ემუქრებიან ვენესუელას – რეჟიმის ცვლილება, სამხედრო ტერაქტი – ამორალურია, დანაშაულებრივია და უკანონოა“, – განაცხადა მადურომ.
მან ასევე მოუწოდა ქვეყნის მოქალაქეებს, გაწევრიანდნენ თავდაცვით რაზმებში აშშ-ის შესაძლო შეჭრის აღსაკვეთად და დაავალა სამოქალაქო თავდაცვის რაზმებს, დღეიდან ყოველ პარასკევსა და შაბათს ჩაატარონ წვრთნები. მისი თქმით, აშშ-ის ქმედებები მხოლოდ აძლიერებს მის ხელისუფლებას.
ერთმა ამერიკელმა ოფიციალურმა პირმა, რომელმაც ანონიმურობის პირობით მისცა კომენტარი „როიტერს“, დაადასტურა, რომ რეგიონში გაგზავნილია წყალქვეშა ნავი და შვიდი ხომალდი, მათ შორის „სან ანტონიო“, „ივოჯიმა“ და „ფორტ ლოდერდეილი“.
სააგენტოს ცნობით, 4,500 სამხედრო მოსამსახურიდან 2,200 საზღვაო ქვეითია. ასევე, წყაროების ცნობით, ამერიკული სამხედრო ძალები რეგიონში იყენებენ სადაზვერვო თვითმფრინავებს – P-8-ებს, რომლებიც საერთაშორისო წყლებში ოპერირებენ.
ცნობისთვის, აშშ-ის პრეზიდენტი დონალდ ტრამპი ნარკოკარტელებთან ბრძოლას თავის ადმინისტრაციის ერთ-ერთ მთავარ ამოცანად ასახელებს უფრო ფართო ძალისხმევის ფარგლებში, რომელიც მიმართულია მიგრაციის შეზღუდვისა და აშშ-ის სამხრეთ საზღვრების უსაფრთხოების უზრუნველყოფისკენ.