ბერლინი ჯერჯერობით არ აპირებს ევროკავშირის ინიციატივის მხარდაჭერას, რომელიც ისრაელის წინააღმდეგ სანქციების დაწესებას გულისხმობს. ამის შესახებ გერმანიის საგარეო საქმეთა მინისტრმა, იოჰან ვადეფულმა განაცხადა.
ევროკომისიამ წარადგინა წინადადება, რომ შეჩერდეს ისრაელის კომპანიებისთვის სამეცნიერო კვლევების დაფინანსება. ინიციატივის საფუძველია ევროკავშირის ექსპერტთა შეფასება, რომლის მიხედვითაც, ისრაელის მოქმედებები ღაზის სექტორში არღვევს ევროკავშირსა და ისრაელს შორის გაფორმებულ შეთანხმებას ადამიანის უფლებების დაცვის შესახებ.
თუმცა, ვადეფულის თქმით, მსგავსი სანქციები ნაკლებად იმოქმედებს ისრაელის პოლიტიკურ გადაწყვეტილებებსა და სამხედრო ოპერაციებზე.
„ამიტომაც გერმანია არ არის დარწმუნებული ამ ინიციატივის სისწორეში“, – აღნიშნა მინისტრმა.
მისივე თქმით, ბერლინი სანქციების ნაცვლად უკვე ზღუდავს ისრაელისთვის იარაღის მიწოდებას.
„ვფიქრობ, ეს არის ძალიან მიზნობრივი, მნიშვნელოვანი და აუცილებელი ნაბიჯი,“ – განაცხადა მან.
ევროკავშირის წევრ ქვეყნებს კვლავაც სხვადასხვა პოზიცია აქვთ იმის შესახებ, როგორ უნდა უპასუხონ ღაზის სექტორში მიმდინარე ომსა და გაღრმავებულ ჰუმანიტარულ კრიზისს.