ჩინეთის პრეზიდენტი სი ძინპინი შანხაის თანამშრომლობის ორგანიზაციის სამიტის ფარგლებში ინდოეთის პრემიერ-მინისტრს ნარენდრა მოდის შეხვდა.
შეხვედრის შემდეგ მოდიმ ორ ქვეყანას შორის პირდაპირი ავიამიმოსვლის განახლება დააანონსა, სი ძინპინმა კი აღნიშნა, რომ ჩინეთი და ინდოეთი მეგობრები და პარტნიორები უნდა იყვნენ, რომლებიც ერთმანეთის წარმატებას შეუწყობენ ხელს.
„დრაკონს და სპილოს ერთად ცეკვა შეუძლიათ“, – დასძინა მან.
ბოლო შვიდი წლის განმავლობაში ეს ინდოეთის პრემიერის ჩინეთში პირველი ვიზიტია. Bloomberg-ის ცნობით, ეს „იშვიათი დიპლომატიური გარღვევის“ შედეგად გახდა შესაძლებელი, რომელიც რამდენიმე კვირის წინ მოხდა, როდესაც ნიუ-დელი და პეკინი საერთო საზღვრის სადავო მონაკვეთის ერთობლივ დემარკაციაზე შეთანხმდნენ.
მოდის და სი ძინპინის შეხვედრა ინდოეთისა და აშშ-ის მზარდი უთანხმოების ფონზე შედგა. რამდენიმე დღის წინ პრეზიდენტმა დონალდ ტრამპმა ინდოეთს დამატებით 25%-იანი ტარიფები დაუწესა და ეს რუსეთისგან ნავთობის შესყიდვის გაგრძელებით ახსნა. NYT კი წერს, რომ ორ ქვეყანას შორის ურთიერთობა მას შემდეგ გაფუჭდა, რაც მოდიმ ნობელის პრემიაზე ტრამპის წარდგენას მხარი არ დაუჭირა.