ტრამპის მიერ რუსეთისთვის მიცემული ორი კვირა იწურება, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
ზელენსკიმ აღნიშნა, რომ ორი კვირის წინ აშშ-ის პრეზიდენტმა, დონალდ ტრამპმა რუსეთს ორი კვირა მისცა რეალური მოლაპარაკებებისთვის მზადყოფნის გამოსახატად.
„ორი კვირის წინ ვაშინგტონში ითქვა, რომ ამ დროისთვის რუსები მზად უნდა იყვნენ რეალური მოლაპარაკებებისთვის, ლიდერების დონეზე შეხვედრისთვის. უკრაინა ნამდვილად მზადაა“, – განაცხადა ზელენსკიმ.
უკრაინის პრეზიდენტმა აღნიშნა, რომ რუსეთის პრეზიდენტი ვლადიმერ პუტინი, რომელიც ოთხდღიანი ვიზიტით ჩინეთში, შანხაის თანამშრომლობის ორგანიზაციის სამიტში მონაწილეობის მისაღებად ჩავიდა, „ისევ თავს დაიძვრენს ამ მდგომარეობიდან, ეს მისი ნომერ პირველი სპორტია“.
„მთელ მსოფლიოში ყველა ამბობდა, რომ ცეცხლის შეწყვეტა აუცილებელი იყო, ყველა ამტკიცებდა, რომ ომი უნდა დასრულებულიყო. ეს იყო ყველას პოზიცია, ჩინეთიც, ჩვენ ამაზე ვისაუბრეთ ინდოეთის პრემიერ-მინისტრთან, ასევე სხვა ლიდერებთან, რომლებიც ახლა სამიტზე არიან – თურქეთი, აზერბაიჯანი, ყაზახეთი, მსოფლიოს თითქმის ყველა დანარჩენი ქვეყანაც მხარს უჭერს ომის დასრულებას. დღეს რომის პაპმაც გააკეთა განცხადება და დიდი მადლობა მას ამისთვის. ერთადერთი, ვისაც ომი სურს, რუსეთია. ჩვენ ველოდებით, რომ არავინ შეეგუება ომის გაჭიანურებას, ჩვენ ველოდებით მტკიცე პოზიციას აშშ-სგან, ევროპისგან, „დიდი ოცეულის“ ქვეყნებისგან“, – აღნიშნა ზელენსკიმ