აშშ ღაზის სექტორის მთელი მოსახლეობის „გადასახლებას“ გეგმავს. როგორც გამოცემა „ვაშინგტონ პოსტი“ იუწყება, ომის შემდგომი ღაზის სექტორის აღსადგენად ტრამპის ადმინისტრაცია ტერიტორიაზე კონტროლის აღებას, სულ მცირე, ათი წლის გადით გეგმავს და ამ პერიოდში იქ კურორტსა და მაღალტექნოლოგიურ ჰაბს შექმნის.
გაწერილ 38-გვერდიან გეგმაში, რომელსაც „ვაშინგტონ პოსტის“ რედაქცია გაეცნო, ასევე საუბარია, სულ მცირე, დროებით მაინც, ორმილიონიანი მოსახლეობის გადასახლებაზე, რაც ან სხვა ქვეყანაში „ნებაყოფლობით“ გადასვლას, ან რეკონსტრუქციის განმავლობაში ამ ხალხის უსაფრთხო ზონებში განთავსებას გულისხმობს.
მიწის მესაკუთრეებს შესთავაზებენ ციფრულ ტოკენებს რეკონსტრუქციის უფლების სანაცვლოდ. ეს აქტივი, შეიძლება, გამოყენებულ იქნეს სხვა ადგილას ცხოვრებისთვის ან მოგვიანებით გაიცვალოს ღაზის სექტორში აშენებული 6-8 „ჭკვიანი ქალაქის“ ბინაში, რომელიც დაპროექტებული და შექმნილი იქნება ხელოვნური ინტელექტის გამოყენებით.
ამავდროულად, თითოეულ პალესტინელს, რომელიც წასვლის გადაწყვეტილებას მიიღებს, 5 000 აშშ დოლარს გადაუხდიან და მისცემენ თანხებს მომდევნო ოთხი წლის განმავლობაში საცხოვრებლის ქირაობისთვის და ერთი წლის განმავლობაში საკვებით უზრუნველსაყოფად.
ასევე, „ვაშინგტონ პოსტი“ წერს, რომ შექმნილია ფონდი Great Trust-ი ღაზის სექტორის რეკონსტრუქციისთვის, რომელიც, ტრამპის გეგმის მიხედვით, წარმართავს აღდგენის პროცესს და ის ნაწილობრივ იმავე პირების მიერ არის შექმნილი, რომლებმაც „ღაზის ჰუმანიტარული ფონდი“ დააფუძნეს.