აშშ-ში, კოლორადოს აეროპორტში დაშვების მცდელობისას ორი მცირე ზომის თვითმფრინავის შეჯახების შედეგად ერთი ადამიანი დაიღუპა და სამი დაშავდა. ინფორმაციას abcnews-ი ავრცელებს.
აშშ-ის ფედერალური საავიაციო ადმინისტრაციის (FAA) ცნობით, Cessna 172 და Extra Flugzeugbau EA300 ტიპის თვითმფრინავები ფორტ მორგანის მუნიციპალურ აეროპორტს უახლოვდებოდნენ, როდესაც ერთმანეთს ჰაერში შეეჯახნენ. მორგანის ოლქის შერიფის ოფისის ცნობით, თვითმფრინავი Cessna აეროპორტში დასაშვებად საბოლოო მანევრს ასრულებდა, როდესაც მას ჰაერში მეორე პატარა თვითმფრინავი შეეჯახა, რომელთაგან თითოეულში ორი ადამიანი იმყოფებოდა.
მედიის ცნობით, შეჯახების შედეგად თვითმფრინავი ჩამოვარდა და ცეცხლი გაუჩნდა.
ხელისუფლების განცხადებით, მათ ჩამოვარდნის შესახებ ზარი კვირას, ადგილობრივი დროით, დაახლოებით, დილის 10:44 საათზე მიიღეს.
მედიის ცნობით, სამი დაშავებულიდან ერთი კლინიკაში გადაიყვანეს, ორს კი მსუბუქი ტრავმები ჰქონდა მიღებული. საქმეზე დაწყებულია გამოძიება.