კრწანისის რაიონში მაჟორიტარი დეპუტატის რანგში უკვე მესამედ ვიყრი კენჭს და ჩემთვის არის უზარმაზარი პატივი და ნდობა გუნდისგან. მანამდე კიდევ ვიყავი კრწანისის რაიონის გამგებელი. აქედან გამომდინარე, მართლაც ძალიან კარგად ვიცი ის პრობლემები, რაც გააჩნდა ამ რაიონს, რისი გაკეთებაც შევძელით, რა პრობლემების აღმოფხვრა შევძელით და რა დაგვრჩა კიდევ გასაკეთებელი, – განაცხადა „დღის ქრონიკაში“ კრწანისის რაიონის მაჟორიტარი დეპუტატობის კანდიდატმა, ლევან ჯაფარიძემ.
მისივე თქმით, „თბილისი ცოცხალი ორგანიზმია და რაც არ უნდა აკეთო საქმე, პრობლემები ყოველთვის წამოგეწევა“. ამდენად, დედაქალაქს ადმინისტრირებაში სჭირდება ის გუნდი, რომელიც მუხლჩაუხრელად, ყოველთვის იქნება მზად, იშრომოს.
„არ შეიძლება, რომ პრობლემები ამოილიოს. ყველაფერი არის ცვეთადი, პრობლემები გეწევა. ჩემი რაიონი დიდი რაიონია. ლანდშაფტურადაც ძალიან მრავალფეროვანია, ისევე, როგორც მოსახლეობის მხრივ და რა თქმა უნდა, პრობლემებიც განსხვავებულია.
ჩვენი ერთ-ერთი მძიმე პრობლემაა ავარიული სახლები სოლოლაკში, ხარფუხში, ძველ, ისტორიულ უბნებში. მიდის წლების განმავლობაში ინტენსიური მუშაობა, რათა ეს პრობლემები მოგვარდეს. ვცდილობთ, ახალ-ხალი პროგრამების შემუშავებას. ამ ადამიანებთან კონტაქტს, ეს არის ყოველდღიური რუტინა, რაზეც 24 საათის განმავლობაში უნდა იმუშაონ ადამიანებმა“, – განაცხადა ჯაფარიძემ.
მისივე თქმით, პრობლემა ბევრია, თუმცა საჭიროა, სწორად ხდებოდეს მათი პასპორტიზაცია და პრიორიტეტების განსაზღვრა, რომლითაც ადმინისტრაციამ უნდა იმუშაოს.