აშშ-ის პრეზიდენტმა, დონალდ ტრამპმა ევროპელ ლიდერებს განუცხადა, რომ ევროპამ უნდა შეწყვიტოს რუსული ნავთობის შესყიდვა, რომელიც, მისი თქმით, მოსკოვს უკრაინის წინააღმდეგ ომის დაფინანსებაში ეხმარება. ინფორმაციას ამის შესახებ სააგენტო Reuters-ი თეთრი სახლის ოფიციალურ პირზე დაყრდნობით ავრცელებს.
ტრამპი შეუერთდა „მსურველთა კოალიციის“ ქვეყნების ლიდერების სატელეფონო საუბარს, რომელსაც საფრანგეთის პრეზიდენტი, ემანუელ მაკრონი თავმჯდომარეობდა.
„პრეზიდენტმა ტრამპმა ხაზგასმით აღნიშნა, რომ ევროპამ უნდა შეწყვიტოს რუსული ნავთობის შეძენა, რომელიც ომს აფინანსებს. რუსეთმა ევროკავშირისგან ნავთობის გაყიდვიდან ერთ წელიწადში 1.1 მილიარდი ევრო მიიღო. პრეზიდენტმა ასევე ხაზგასმით აღნიშნა, რომ ევროპელმა ლიდერებმა ეკონომიკური ზეწოლა უნდა მოახდინონ ჩინეთზე, რადგან ის რუსეთის ომის ძალისხმევას აფინანსებს“, – განაცხადა თეთრი სახლის ოფიციალურმა პირმა.