ემანუელ მაკრონი ისრაელში სასურველი სტუმარი იქამდე არ იქნება, ვიდრე საფრანგეთი უარს არ იტყვის პალესტინის სახელმწიფოს აღიარებაზე, – ამის შესახებ ისრაელის საგარეო საქმეთა მინისტრმა, გიდეონ საარმა საფრანგეთის საგარეო საქმეთა მინისტრს, ჟან-ნოელ ბაროს სატელეფონო საუბრისას განუცხადა.
ისრაელის საგარეო საქმეთა სამინისტროს განცხადებაში აღნიშნულია, რომ სატელეფონო საუბრისას საარმა ბაროს მიმართა რეკომენდაციით, გადახედოს საფრანგეთის ინიციატივას პალესტინის სახელმწიფოს აღიარების შესახებ, რადგან „ეს ინიციატივა ზიანს აყენებს სტაბილურობას ახლო აღმოსავლეთში და აზიანებს ისრაელის ეროვნულ და უსაფრთხოების ინტერესებს“.
„ისრაელს კარგი ურთიერთობები სურს საფრანგეთთან, მაგრამ საფრანგეთმა პატივი უნდა სცეს ისრაელის პოზიციას, როცა საქმე ეხება მისი უსაფრთხოებისა და მომავლისთვის არსებით საკითხებს”,– განაცხადა საარმა.
ცნობისთვის, გუშინ მედიაში გავრცელდა ინფორმაცია, რომ ისრაელის პრემიერ-მინისტრმა, ბენიამინ ნეთანიაჰუმ საფრანგეთის პრეზიდენტს, ემანუელ მაკრონს ისრაელში ვიზიტით ჩასვლაზე უარი უთხრა. გავრცელებული ინფორმაციით, ნეთანიაჰუმ მაკრონს პირობა წაუყენა, უარი ეთქვა პალესტინის სახელმწიფოს აღიარების გეგმაზე. მოთხოვნას საფრანგეთის პრეზიდენტი არ დათანხმდა.