აშშ-ის პრეზიდენტმა, დონალდ ტრამპმა განაცხადა, რომ ვენესუელის სამხედრო თვითმფრინავები თუ აშშ-ის გემებს შეუქმნიან საფრთხეს, მათ ჩამოაგდებენ.
ტრამპმა ეს განცხადება მას შემდეგ გააკეთა, რაც აშშ-ის ოფიციალურმა პირებმა „ბიბისის“ განუცხადეს, რომ ვენესუელის სამხედრო ავიაცია სამხრეთ ამერიკის სანაპიროსთან მყოფ ამერიკულ გემს მიუახლოვდა.
მანამდე, აშშ-ში განაცხადეს, რომ იერიში მიიტანეს ვენესუელიდან მცურავ ნარკოტიკებით დატვირთულ გემზე, რომელსაც კრიმინალური ბანდები აკონტროლებდნენ. შედეგად 11 ადამიანი დაიღუპა.
ვენესუელის პრეზიდენტმა, ნიკოლას მადურომ განაცხადა, რომ აშშ-ის ბრალდებები მისი ქვეყნის წინააღმდეგ არ შეესაბამება სიმართლეს და რომ ორ ქვეყანას შორის უთანხმოება „საბრძოლო კონფლიქტს“ ვერ გაამართლებს.
„ვენესუელა ყოველთვის მზად იყო დიალოგისთვის, საუბრისთვის, მაგრამ ჩვენ პატივისცემას მოვითხოვთ“, – აღნიშნა მან.
მას შემდეგ, რაც 2025 წლის იანვარში ტრამპი თეთრ სახლში დაბრუნდა, გააძლიერა ნარკოტიკებთან ბრძოლის ძალისხმევა ლათინურ ამერიკაში.
ვენესუელის პრეზიდენტმა კი აშშ დაადანაშაულა ქვეყანაში რეჟიმის შეცვლის მცდელობაში სამხედრო მუქარის გზით.
ცნობისთვის, ნარკოტიკების ნაკადის შესაჩერებლად აშშ-ის არმიამ კარიბის ზღვის სამხრეთში დამატებითი ძალები განათავსა, მათ შორის სამხედრო გემები და ათასობით საზღვაო ქვეითი და მეზღვაური.
თეთრმა სახლში ასევე განაცხადეს, რომ პუერტო რიკოში ათი F-35-ის ტიპის გამანადგურებელი თვითმფრინავი გაიგზავნება.