უკრაინაში სახელმწიფოს ღალატის ბრალდებით აკრძალული პარტიის, „ოპოზიციური პლატფორმა სიცოცხლისთვის“ დეპუტატი დააკავეს. უკრაინის უსაფრთხოების სამსახურისა და გენერალური პროკურატურის ცნობით სასამართლომ მას წინასწარი პატიმრობა შეუფარდა.
უკრაინის პროკურატურის განცხადებაში აღნიშნულია, რომ რადის მეცხრე მოწვევის დეპუტატი უკრაინის ტერიტორიაზე დააკავეს. მედიის ინფორმაციით, კი ის კიევს არაბთა გაერთიანებული საამიროების ხელისუფლებამ სასამართლო ექსტრადიციის პროცედურის გარეშე გადასცა.
დეპუტატის სახელი ოფიციალურად არ გაუსაჯაროებიათ, თუმცა, უკრაინული მედია იუწყება, რომ საუბარია ფიოდორ ხრისტენკოზე. უკრაინის უსაფრთხოების სამსახურის განცხადებით, დეპუტატი რუსეთის ფედერალური უსაფრთხოების სამსახურმა მოისყიდა, მისგან 2020-21 წლებში ინფორმაციას იღებდა. მოგვიანებით, ხრისტენკო ქვეყნიდან გაიქცა.